Munisipyo sa Compostela 'Gisulong'

CEBU, Philippines - Mi-ulbo ang kagubot sa munisipyo sa lungsod sa Compostela human kalit nga milusad og rally ang gatusan ka mga supporters ni mayor- elect Joel Quiño ug giingong gi-ransack ang munisipyo aron ipamugos pagpalingkod niini.

Usa ka tuig na nga naproklamar isip mananaug sa pagkamayor sa milabay’ng eleksiyon si Quiño apan hangtud karun wala gihapon maka-asumir tungod sa election protest nga gisang-at sa kaatbang nga si incumbent mayor Ritchie Wagas.

 Alas 7:00 sa buntag mipahigayon og usa ka Santos nga Misa ang mga supporters ni Quiño nga gidumala ni Fr. Emmanuel Son ug gitambungan usab sa gibanabanang siyam ngadto sa napulo ka mga kapitan gikan sa 17 ka mga barangay sa maong lungsod.

Si PO3 Aquilles Tano sa Compostela Police Station mibutyag dihang nahinabi sa Banat News nga gibanabanang 200 ngadto sa 300 ka mga supporters ni Quiño ang nagbarikada sa atubangang bahin sa munisipyo.

Dunay 15 ngadto sa 20 ka mga political supporters usab ni kanhi mayor Ritchie Wagas ang diha usab nagtapok sa daplin sulod sa compound sa municipal hall.

Atol sa Santos nga Misa gipikhan atol sa wali sa pari ang kalangay sa Commission on Elections pagsulbad sa election protest ni Wagas nga maoy nakapugong pag-asumir ni Mayor Quiño sa katungdanan tungod kay pabilin kining pending pagkakarun.Pagkahuman gyud sa Santos nga Misa gikatahong pugsanong nanulod ang mga supporters ni Quiño ug pugsanong giguba ang kandado sa pultahan sa munisipyo.

Dihang nabuksan gihulagway nga gi-takeover sa mga supporter ang mga buhatan sa maong munisipyo. Pipila ka minutos ang milabay nangabot sila si bise Quiño, ingon man ang iyang bise mayor Antonette Danggoy ug ang walo ka mga konsehal nga pulos wala makalingkod sa ilang mga pwesto aron paghatag og suporta sa ilang mga supporters.

Ang hepe sa Compostela Police Station nga si Sr. Insp. Rodrigo Giangan daling mimando sa pagbutang og mga polis sa maong munisipyo alang sa pagpatunhay sa kahusay ug kalinaw sa rally inabagan sa gi-detail nga mga sakop sa Special Reaction Unit (SRU) gikan sa Cebu Police Provincial Office (CPPO).

Si Quiño namahayag atubangan sa iyang mga supporters nga dili siya manaug sa munisipyo ingon man ang iyang besi mayor ug mga konsehal hangtud dili resulbahon sa Comelec ang election protest.

Gani si Quiño mipadayag kagahapon nga mosugod na siya og trabaho sa iyang opisina. Ang kampo ni Wagas kagahapon mipahimutang usab sa ilang mga supporters atbang sa mga dumadapig ni Quiño.

Nasayran usab nga paralisado ang operasiyon sa balay lungsod sa Compostela gumikan sa nahitabo.

Si Department of Interior and Local Government (DILG-7) director Pedro Noval mipadayag atol sa interbyu sa DyDD nga wala pa gihapon silay nadawat nga kamanduan gikan sa Comelec nga nagtugot kang Quiño ug mga kaubanan nga maka-asumir sa katungdanan.

Gi-klaro ni Noval nga hangtud kagahapon ang iyang Provincial director sa DILG nga si Gerome Gonzales mao gihapoy nagsilbing caretaker sa maong lungsod.

Ipasusi usab ni Noval ang report nga naparalisar ang operasiyon ug mga transaksiyon sa balay lungsod sa Compostela gumikan sa maong rally ug mibahad nga pinaagi sa pag-abag sa kapulisan iyang ipatuman ang balaod ug ipabungkag ang barikada ug mga raliyista kun magmagahi si Quino ug mga kaubanan nga mopadayon sa pag- okupar sa munisipyo nga walay ikapakitang kamanduan gikan sa korte.

Si Provincial Election officer Lionel Marco Castillano miingon nga dili pa makalingkod si Quiño ug mga kaubanan tungod kay pabiling natanggong sa Comelec ang election protest ni Wagas. (EIM)(BANAT NEWS)