CEBU, Philippines - Gitakda nga moabot dinhi sa Sugbo ang grupo sa mga Koreanong doktor gikan sa Yeosu City, South Korea karong Hulyo alang sa ilang medical mission, matud pa ni Konsehal Roberto Cabarrubias sa dakbayan sa Sugbo.
Sumala ni Cabarrubias nga ang maong grupo may puntariya nang mga barangay nga mao ang Guba ug Bonbon diin adto sila mopahigayon sa ilang pagpanambal.
Si Cabarrubias kinsa bag-o lang nahiabot gikan sa Korea diin mitambong siya sa Great Turtle Ship Festival nagkanayon nga didto niya makuha kining maong kasayoran dihang gikahinabi niya ang mga kadagkuan sa maong grupo.
Gawas sa medical mission, ang kagamhanan sa Korea mohatag usab og donasyon nga 60 ka unit nga computer nga gitakdang moabot karong sunod buwan.
Matud pa ni Cabarrubias nga dako na kaayo kini og tabang sa mga tunghaan nga nagkinahanglan og mga kahimanan sa teknolohiya. Gipasusi na karon sa konsehal ang mga pampublikong tunghaan sa siyudad aron matino ang labing nanginahanglan sa maong mga computer unit.
Giklaro sa konsehal nga pulos brand new ang maong mga computer nga mapahimuslan sa mga Sugboanong estudyante. (BANAT NEWS)