CHED may scholarship slot

CEBU, Philippines -  Si Assistant Regional Director Candelario Aytona sa Commission on Higher Education (CHED) 7 mibutyag kagahapon nga adunay 700 ka mga estudyante ang nang-apply karon sa 400 kapin ka scholarship slot alang sa umaabot pag-abli sa klase.

Si Aytona mipahayag niini atol sa AGIO Forum nga gipahigayon didto sa buhatan sa Philippine Information Agency (PIA)7 kinsa nagkanayon nga ang maong scholarship grant ubos kini sa Student’s Financial Assistance Program (STUFAP) nga nagtanyag og duha ka matang sa scholarship nga mao ang Full ug Half Merit Scholars alang niadtong mga tinun-an nga migraduwar nga may honor.

 Ang mga aplikante ipa-ubos pa sa screening base sa ilang scholastic records ug financial capabilities.

Sa maong forum giawhag ni Aytona ang mga umaabot nga tinun-an sa kolehiyo nga mokuha sa kurso bahin sa Agriculture, Mechanical Engineering ug Environment kay mao kini mga kursong labing kusog ang panginahanglan karon.

Iyang gipasabot nga ang kurso nga may labot sa Agriculture gikinahanglan kaayo sa atong nasud alang sa pagpalambo sa atong pagkaon gikan sa kaumahan.

Samtang sa Mechanical Engineering gikinahanglan usab sa pagpalambo sa mga pasilidad alang sa tanang matang makinarya, samtang ang Environment gikinahanglan kaayo aron maatiman ang kalikopan sa nasud.

Sa samang higayon gidid-an ni Aytona ang mga estudyante sa pagkuha sa mga kurso sama sa Education, Maritime, IT ug Business Administration, HRM ug Commerce, kay daghan na kaayo ang mikuha ning mga kursoha unya wala nay kasudlang mga industriya karong panahona.

Ang ubang programa sa STUFAP mao ang One-Town One-Scholar (OTOS) Program, diin matag lungsod kuhaan og tagsa ka scholar nga gastohan sa nasudnong kagamhanan, ug congressional scholar, nga gastohan sa pork barrel sa kongresista, ug ang Study Now, Pay Later Program. (BANAT NEWS)