P250 mil sa kabanay sa napatay nga mga CAFGUs

CEBU, Philippines -  Kinsay nag-ingong ang Citizens Armed Forces Geographical Unit (Cafgu) paon lang ngadto sa mga rebelde ug walay mapaabot nga benepisyo gikan sa gobiyerno.

Gipahibalo sa Armed Forces of the Philippines nga karong adlawa ihatag ni Presidente Benigno Aquino III ang P2.4 milyones nga cash ngadto sa mga nabiyuda sa mga sakop sa Cafgu nga napatay sa pagpanalipod sa nasud batok sa mga kaaway niini.

Sa usa ka seremonyas alas-10 sa buntag karong adlawa sa Marco Polo Plaza Hotel itunol sa AFP ang P250,000 cash sa mga kabanay sa mga nakalas nga Cafgu kun Cafgu Active Auxiliary (CAA) sa nagkadaiyang engkwentro tali sa mga sundalo ug rebelde sa Samar, Northern Samar, Capiz, Iloilo, Nueva Ecija, Lanao del Sur ug Negros.

Ang mga namatay mao sila si CAA Renato Baragenio ug Resituto Aniban, mga enlisted personnel sa Philippine Army nga sila si Corporal Alexander Bayugo ug Douglas Jumagdao, Private Class Eugene Daquil ug PFC Jonathan Sibay.

Ang kwarta magagikan sa social funds sa presidente. Si Brigadier Gen. Alejandro Estomo, deputy commander sa CentCom inabagan ni Col. Alden Juan Masagca ang Senior Military Assistant sa Office of the President Adviser sa Military Affairs maoy motunol sa maong salapi.

Apil usab sa pahalipayan og P100 mil ang grabeng naangol ug P50 mil sa dili kaayo grabeng naangol sa engkwentro. Ang makadawat sa kantidad nga P100, 000 mil mao sila si 2nd Lt. Philip Muyco, PFC Santiago Vallite, PFC Jerry Gabutan, PFC Melvin Buctot ug Cpl. Rolly Casipe

Samtang ang makadawat sa 50, 000 mil mao sila si PFC Arman Andilab, Howel Villa, Danger Paler, Randy Bernate, Edgar Igdalino, Normie Liorente ug Rex Velasco ug Sgt. Henry Rosal. (BANAT NEWS)