Na-missing sa SRP nakit-an patay na

CEBU, Philippines - Nakit-an na kagahapon sa buntag ang patay’ng lawas sa usa ka 23-anyos nga na-missing niadtong Domingo sa hapon diha sa taytayan sa South Road Property (SRP) samtang nangaligo uban sa iyang mga higala.

Ang mga sakop sa Bureau of Fire Protection (BFP), Philippine Coast Guard (PCG) ug Cebu City Disaster Coordinating Council (CCDCC) nagtinabangay sa pagpangita kagahapon sa kaadlawon hangtud na sa pagkabuntag.

Nakit-an nga naglutaw sa dagat si Rodnick Labitad (di Rodney Claritad sa unang report), 23, taga sitio Hawaii sa barangay Cogon, Pardo ning dakbayan Si Alvin Santillana, Executive Office sa CCDCC nga maoy nangulo sa search and rescue operation nagkanayon nga alas-4 pa nasigpati ang patay’ng lawas apan tungod sa kakusog sa ‘sulog’ ug kadagko sa bawod gianod kini ug balik ug wala makit-i.

Pagka alas-6 kagahapon sa buntag ang mga sakop sa PCG mitabang sa BFP nga pinangulohan ni Supt. Anderson Comar aron sa pagpangita og balik kang Labitad.

Apan alas-10 na kagahapon kini nakit-an og balik duol sa usa ka motorbanca sa barangay Mambaling.

Si Gloria Labitad, 58, inahan sa biktima mitug-an nga kun nakahibawo pa unta siyang mokuyog iyang anak niadtong Domingo sa pagpangaligo og dagat sa ilang silingan dili gyud unta siya mosugot niini.

Si Rodnick usa lang sa kapin sa usa ka gatos nga tinun-ang wala makapaso sa high school niadtong Marso diha sa Pardo hinungdan nga mibalik kini sa 4th year karung tuiga.

Midugang usab ang inahan sa interbyu sa DyHP nga classmate sa iyang anak nga nalumos ang dalagitang naghikog kapin usa ka semana na ang milabay.   (BANATNEWS)