CEBU, Philippines - Usa ka Overseas Filipino Worker (OFW) nga bakasyonista ang nasikop sa entrapment operation sa mga sakop sa Investigation and Detective Management Branch (IDMB) sa Cebu City Police Office (CCPO) sa miaging gabii sulod sa usa ka food chain diha sa barangay Lahug siyudad sa Sugbu.
Si Niño Gela alyas ‘John ug Jun’ lumad nga taga Bacolod City apan temporaryong nagpuyo diha sa Gorordo Avenue sa barangay Lahug nasikop sa IDMB pinangulohan ni SPO2 Felomino Mendaros.
Si Mendaros nga nahinabi sa Banat News nagkanayon nga midangop sa ilang buhatan sila si Ares Viovicente, usa ka call center agent ug Reynante Valiete, checker sa usa ka department store nga pulos taga Gorordo Avenue sa barangay Lahug aron ipa-entrap ang suspetsado.
Ang duha mitug-an nga nakaila nila ang suspetsado human sila gipaila-ila sa usa ka Junabel nga hinigugma usab sa suspek.
Ang duha giingong gipasaligan ni Gela nga makatrabaho sa gawas sa nasud ug mipasalig nga maoy mo-process sa mga requirements sama sa no-working visa, no medical examination ug office fee bugti sa gipangayo nga P3,400.
Matud ni Mendaros nga sila si Viovicente ug Valiete gipahangyo pa sa suspek og P700 isip discount ug nagkasabot nga karung Mayo 16 mohatag sa maong kantidad ini’g abot sa suweldo.
Apan giingong gi-text san sila sa suspek nga nanghulga maong midangop sila sa kapulisan. Wala hinuon giklaro kung unsang matang sa pagpanghulga ang gibuhat sa suspek.
Si Gela nga nahinabi sa Banat News miangkong igo lang siya mitabang nila ni Viovicente ug Valiete nga iyang pasudlon sa iyang agency kun dunay hiring didto sa gawas sa nasud.
Matud ni Gela nga usa siya ka store manager sa fashion and footwares didto sa Riyadh sa Saudi Arabia ug miuli siya niadtong Nobiyembre 18, 2010. Gikatakda unta siyang molarga karung Mayo 11 sa Bahrain apan wala na siya moagi pa sa iyang kanhi recruitment agency nga nagbase sa Manila.
Mihimakak siyang dautan ang iyang tuyo sa duha o pangwartahan sila sanglit igo ra niyang gitabangan nga makasulod sa iyang kanhi agency ang duha apan gilain og sabot ang iyang gibuhat.
Kagahapon sa udto giandam na sa kapulisan ang tukmang kaso nga ilang ipasaka ngadto sa piskaliya batok kang Gela .(EIM) (BANATNEWS)