CEBU, Philippines - Ang sangka nila ni Manny Pacquiao ug Shane Mosley niadtong Domingo nakatampo sa kamalinawon sa piyesta sa dakbayan sa Mandaue sa maong adlaw.
Ang kapolisan wala makasugat og dagkong alarma sama sa pagpamusil, pagpanunggab ug uban pang krimen.
Hinuon may panglungkab sa bangko nga gituohan sa kapolisan nga nahitabo kini sa Domingo sa kaadlawon.
Si SPO2 John Calamba sa kapolisan sa Presinto 5 sa Opao Police Station nga nahinabi sa Banat News miingon sa tibuok adlaw’ng Domingo nga maoy kahulogan sa piyesta wala silay nasugatang dagko nga alarma gawas lamang sa duha ka tawo nga ilang gipakatulog sa sulod sa selda tungod sa kahubog.
Matud pa ni SPO2 Calamba nga nakatampo sa maong kalinaw ang away nila ni Pacquiao ug Mosley kay nasentro man ang pagtagad sa katawhan sa maong sangka nga giatangan na sukad pa sa buntag hangtod na sa pagka-gabii sa maong adlaw.
Samtang si PO1 Jesson Estrera sa kapolisan sa Presinto 1 sa Centro Police Station miingon nga bisan sa naghuot nga mga tawo nga nanimba sa National Shrine of Saint Joseph ug sa mga dapit nga gihimo ang mga kalingawan sa maong tinuig nga kasaulogan, wala sila makadawat og taho nga may nabiktima sa pagpanguot, pagpangawat ug pagpanglabni.
Mao usab kini ang gibutyag ni SPO1 Emmanuel Enople sa Presinto 2 sa barangay Subangdaku kinsa miingon nga malinawon ang tinuig nga piyesta sa Mandaue karong tuiga.
Kining tanan maoy kalampusan sa mga pahimangno ni Senior Superintendent Noel Gillamac, direktor sa Mandaue City Police Office (MCPO) ngadto sa iyang mga sakop sa wala pa moabot ang maong adlaw. (WC) (BANATNEWS)