Landslide pito ka balay nangaguba

CEBU, Philippines - Laing landslide ang nahitabo sa barangay Bairan siyudad sa Naga niadtong Domingo sa hapon nga nakaguba sa gibanabanang pito ka panimalay epekto sa mga pag-uwan-uwan nga giingong hinungaw sa bagyong Bebeng. 

Kagahapon sa buntag personal nga gibisita ni Naga Mayor Valdemar Chiong kauban si City administrator Engr. Arthur Villamor ang maong lugar aron pagsusi sa panginahanglan sa mga pamilyang apektado.

Gibutyag ni Chiong nga nangaguba gyud ang pito ka mga panimalay ug dunay uban ang hapit nga matumba hinungdan nga girekomendar dayun sa mayor ang dinaliang pagpabakwit sa gibanabanang 15 ka pamilya sa maong dapit.

Matud ni Chiong peligrong puy-an ang maong lugar gumikan kay ikaduha na kini ka higayon nga nakasinati og landslide ug gikonsiderar na kini karong landslide prone area.

Sukad kagahapon wala pa makadawat ang mayor sa listahan sa pangalan sa mga pamilyang apektado gikan sa mga social worker nga iyang gitahasan paghimo og dugang pakisusi sa maong dapit.

Matud sa mayor ilang paningkamutan nga mahatagan og hinabang pinansiyal ang maong mga pamilya aron magamit alang sa pagpangita niini og kabalhinan. Hinuon gipadayag sa mayor nga moabot lang og P5,000 ang labing daku nga ayuda nga ihatag sa lungsod sa mga biktima sa kalamidad.