CEBU, Philippines - Pito ang angol sa panagbangga sa duha ka mga multicab diha sa Gate 3 sa Mactan Economic Processing Zone sa barangay Ibo dakbayan sa Lapulapu kagahapon sa buntag.
Usa sa mga naangol mao ang drayber sa pasaheroang multicab nga si Randy Balindo, samtang ang iyang mga pasahero nga nangaangol usab mao sila si Jennie Momo, 33, residente sa Pool barangay Bankal; Gercy Pistola, 20; Rolando Alberto, 21, ug Marilyn Manumbag, 20, mga residente sa Saac dakbayan sa Lapulapu.
Samtang naangol usab ang nagmaneho sa pribadong multicab nga si Samuel Morris Limutan, ug ang mga pasahero niini nga sila si Liza Amarsosa, 30, residente sa sitio Buyong barangay Maribago dakbayan sa Lapulapu ug Viviano Abrigana, 40, residente sa Talamban dakbayan sa Sugbu.
Base sa imbestigasyon ni Lt. Danilo Ledesma sa MEPZ Police nasuta nga mga alas 5:15 kagahapon sa kaadlawon nahitabo ang panagbangga.
Gikan sa Mactan padulong sa barangay Centro sa dakbayan sa Lapulapu ang pasaheroang multicab sa dihang kalit kini gibanggaan sa multicab ni Limutan.
Nasuta usab nga mi-overtake si Limutan sa laing sakyanan sa kurbadahong bahin hinungdan nga gikasugat niini ang PUJ multicab.
Daw papel nga gikumot ang maong mga sakyanan apan si Balindo nakalingkawas gihapon sa iyang driver seat ug nahiagum og mga samad sa iyang ulo ug tiil.
Samtang ang mga pasahero sa duha ka sakyanan nahiagum usab og mga bun-og ug samad sa kalawasan hinungdan nga daling gidala sa mga sakop sa Emergency Rescue Unit Foundation sa Mactan Doctors Hospital. (BANATNEWS)