CEBU, Philippines - Kutob na lang karong Domingo, Mayo 15 ang gihatag nga extension sa korte sa pagpuyo sa gatosan ka mga pamilya sa sitio San Miguel, barangay Apas niining dakbayan sa Sugbo.
Sumala pa ni barangay kagawad Allan Mahait nga nabalaka na ang pipila ka mga residente sa maong dapit sanglit wala pa kini ideya kung aduna ba’y relocation site ang kagamhanan nga pabalhinan kanila.
Miingon si Mahait nga malagmit makakuha og temporary restraining order ang mga residente sa sitio San Miguel gikan sa korte.
Kasamtangang gipaabot sa mga maapektohan sa demolisyon ang positibong tubag sa kagamhanan sa siyudad sa Sugbo sa ilang problema.
Gipadayag ni Mayor Michael Rama nga iyang gitugyan ang maong problema sa Department for the Welfare of the Urban Poor (DWUP).
Padayon usab karon nga gihingusgan sa mga residente ang ilang kawsa sa pagpatuman sa City Ordinance No. 1772 nga nagdeklarar sa maong dapit nga usa ka socialized housing site.
Ang mga sakop sa Archangels Residents Mergence Inc. mipadayag nga sakit kaayo sa ilang buot kung mopahawa sa maong lugar gumikan kay kasagaran kanila nagpuyo na sa maong dapit gikan sa 50 ngadto na sa 60 ka tuig.
Dugang pa ni Mahait nga protektahan gyud niya ang katungod sa mga residente busa padayon niyang gi-follow up ang kagamhanan sa siyudad aron matabangan ang apiktadong mga molupyo sa taliabot nga demolisyon. (WC)