Pusher nga taga Pasil nasikop sa Dalaguete

CEBU, Philippines - Usa ka suspetsadong drug pusher kinsa giingong nahalinan dili pa dugay og 200 ka paketeng shabu nga mikantidad og P30 mil nasikop sa gipahigayong buy-bust- operation sa kapolisan didto sa sitio Guiwanon, barangay Poblacion, lungsod sa Dalaguete sa miaging gabii.

Ang nasikop giila sa mga polis nga si Jonel “Simon” Ramas, 25, taga barangay Pasil, dakbayan sa Sugbo samtang ang kauban niya si Kentoy Buenconsejo nakaikyas ug padayon pang gipangita sa mga polis. Si Ramas giposasan dayon sa mga polis human dawata niini ang P300 nga buy-bust money gikan sa poseur buyer kinsa mipalit kunohay og ginadiling drugas kaniya.

Apan si Buenconsejo giingong nakalugnot gikan sa polis nga migunit kaniya ug nakadagan kini.

Naimbargo gikan kang Ramas ang duha ka gagmay’ng paketeng shabu, usa ka medium nga pakete, mga ginunting nga aluminum foil, ug P700 nga kwarta nga gituohan nga halin sa ginadiling drugas.

Ang imbestigador sa Dalaguete Police Station nga si SPO2 Clito Pia mibutyag nga si Ramas gipanid-an nila sulod sa usa ka buwan una sila mipahigayon og operasyon.

Si Ramas giingong nasikop sa mga polis sa usa ka apartment nga gipuy-an niini nga gipanag-iya sa paryente ni Buenconsejo nga nailhan lang sa ngalang “Peping”.

Matud ni Pia nga sa ilang nahipos nga report si Ramas nahalinan 200 ka paketeng shabu sa milabay’ng duha ka semana atol sa piyesta sa barangay Poblacion.   - BANAT NEWS