'Zero crime' ang Sugbo sa Pacquiao-Mosley fight

CEBU, Philippines - Gihulagway sa duha ka hepe sa kapolisan sa lalawigan ug sa syudad sa Sugbo nga ‘zero crime’ ang tibuok probinsya sa Sugbo atol sa away nilang Manny Pacquiao ug Shane Mosley kagahapong adlawa.

Matud pa ni Sr. Supt Patrocinio Comendador, hepe sa kapolisan sa lalawigan sa Sugbo mipahigayon sila og mobile patrol sa pipila ka lugar sa habagatan ug amihanang bahin sa lalawigan ug gihulagway niya nga generally peaceful tungod sa maong away.

“From 10 am until 2 pm., there was no incident recorded. During such time, CPPO executed operations all over the provinces,” butyag pa ni Comendador pinaagi sa text message.

Nasayran nga atol sa away ni Pacquiao ug Mosley ang kapolisan mipahigayon og checkpoints ug operasyon sa habagatan ug amihanang bahin sa lalawigan sa Sugbo ug sa Metro Cebu areas.

Nagmalaumon si Comendador nga unta ang kalinaw nga iyang nasinati atol sa away ni Pacquiao mao unta ang masinati bisan walay sangka ni Pacquiao.

“With determination of both the people and police, peace could reign,” pasabot pa ni Comendador.

Sa wala pa ang away ni Pacquiao si Comendador mipahimangno na sa iyang mga tawo sa pagbantay sa ilang dapit ilabi na sa mga establisamentong adunay pay-per views.

Samtang sa syudad sa Sugbo gikonsiderar usab ni Sr. Supt. Melvin Buenafe ang hepe sa kapolisan sa syudad sa Sugbo nga nagmalinawon ang away ni Pacquiao ug Mosley.  - BANAT NEWS