Mosley wa mosaler ni Pacman

CEBU, Philippines - Wala man niya makuha ang tinguhang knockout nga kadaugan, milampos gihapon si WBO welterweight champion Manny “Pacman” Pacquiao ug gipamatuod nga wala pay makatupong sa iyang abilidad dihang yanu ra kaayo niyang gidismantol si Shane Mosley kagahapon didto sa MGM Grand Garden Arena sa Las Vegas.

Atubangan sa 16,410 ka mga boxing fans nga misaksi didto sa MGM Arena, ug minilyon usab sa tibuok kalibutan pinaagi sa pay-per-view ug free tv dominanteng gikulit ni Pacquiao ang ika-14 niyang sunod-sunod nga daog pinaagi sa usa ka 12-round unanimous decision batok sa future “Hall-of-Famer” nga si Mosley.

Gituman ni Pacquiao ang mando sa iyang trainer nga si Freddie Roach nga sayong morombo sa lawas ni Mosley ug milampos kini pagpasulod sa iyang mga kombinasyon bisan pa sa lig-ong depensa nga gipakita sa Amerikanong boksidor.

Apan pag-abot sa ikatulong round, nahugyaw ang tibuok MGM Arena dihang usa ka left overhand ang gibuhian ni Pacquiao nga maoy nakapasukarap ni Mosley.

Bisan pa og nakabarog aron ipadayon ang away, tataw kaayo ang dakung epekto sa maong knockdown tungod kay nagpunay nalang og atras ug nagpanagana na paglabay og kumo si Mosley.

Gawas sa pagpanagana nagpunay na og atras ug panggakos ang challenger nga si Mosley, wala makapugong ang mga fans sa pagpauwan sa ilang mga boo.

Hinuon, nalagsik ang tibuok MGM Arena dihang naka-iskor og kontrobersiyal nga knockdown si Mosley batok ni Pacquiao, apan tataw kaayo nga nasayop si referee Kenny Bayless tungod kay dihang gi-replay klaro kaayong gitukmod ni Mosley ang walang punoan sa may ilok ni Pacman.

Tungod ba kaha sa gibuhat sa referee mikalit ka agresibo si Pacquiao kinsa niadtong tungura gihunghungan na ni Roach nga hingpit nang patumbahon si Mosley.

Apan pakyas si Pacman nga mausban ang knockdown ni Mosley tungod sa pagpunay na hinuon niini og atras ug gakos hangtud nga nahurot ang oras.

Human sa dose ka hugna nga binukbukay tulo ka mga hurado ang mihatag og 120-108, 120-107 ug 119-108 tanan pabor ngadto sa Pinoy boxing champion.

Sa pakighinabi human sa away, giangkon ni Pacquiao nga nadismaya siya sa resulta sa away tungod kay napakyas siya paglangkat sa dungog isip labing unang boksidor nga makapatumba ni Mosley.

“It wasn’t my best performance,” matud pa ni Pacquiao kinsa mikompisal nga nakaapekto og daku ang nahiaguman niyang cramps sa tiil sa fourth round. “I did my best. I did not expect this result.”

Sa iyang bahin, si Mosley miangkon nga mao na kadto ang labing lisud nga away sa tibuok karera niya isip boksidor.

“I fought the best fighter in the world,” sigun pa ni Mosley sa Associated Press. “He has exceptional power, power that I’ve never been hit like this before.”

Sama sa gihapon, puno sa pagdayeg ang nadawat ni Pacquiao gikan sa iyang promoter nga si TOP Rank Inc. CEO Bob Arum kinsa mibutyag nga giplantsa na niya ang sunod sangka ni Pacquiao.

Matud pa ni Arum nga daku og posibilidad nga mahitabo ang gipaabot nga “trilogy” tali ni Pacquiao ug sa Mexican lightweight king Juan Manuel Marquez nga tentatibong gitakda sa Nobiyembre 5 o 12 didto sa Las Vegas.  - BANAT NEWS