Mga Barko Wala Kabiyahe Tungod Ni Bebeng

CEBU, Philippines - Gumikan sa bagyong Bebeng pipila ka barko sa Central Visayas ang wala tuguting makabiyahe sa Philippine Coast Guard partikular na ang mga lalawigan sa Samar ug Leyte.

Ang bagyong Bebeng   nagrumbo padulong sa Bicol Region, duha ka mga lalawigan sa Central Visayas ang gibutang sa Signal Number 1 samtang siyam usab ka lugar sa Luzon.

Matud pa ni Boy Artiaga, weather forecaster sa Philippine Atmospheric, Geophysical and Astronomical Services Administration (PAG-ASA) nga alas-4 kagahapon ang epicenter naggikan sa East of Legaspi City nga adunay gikusgon nga 220 kilometro matag oras.

Ang Bebeng nagtuyok sa gikusgon nga 65-80 kph ug nag-irog sa 13 kph nga gihulagway nga hinay kini.

Midugang si Artiaga nga karung hapon molihok si Bebeng 60 km Northeast sa Daet, Camarines Norte ug ugma sa hapon motugpa kini sa amihanan sa Baler sa gikusgon nga 110 km matag oras.

Sa Martes sa hapon moabot kini sa amihanang-kasadpang bahin sa Aparri sa gikusgon nga 190 km matag oras.

Samtang sa Philippine Coast Guard Cebu Station, si Capt. Anelito Gabisan nga nahinabi sa Banat News nagkanayon nga delikado alang sa mga barkong ubos sa 1000 gross tonnage.

Tulo ka barko ug tulo ka motorbangka nga padulong sa Leyte ang wala palargaha kagahapon. Giklaro hinuon niya nga walay na-stranded nga mga pasahero dinhi sa Sugbu.

Samtang sa Tacloban, tulo ka motorbanka ang wala palargaha ug may 15 ka mga pasahero ang na-stranded. Sa Catbalogan, Samar, duha ka barko ang wala makalarga.

Duha usab ka barko ug duha ka motorbanka ang wala usab makalarga sa Ormoc, unom ka barko ug tulo ka motorbanka ang wala makalarga sa Maasin nga adunay 360 ka mga pasaherong na-stranded.

Samtang gipahimangnoan usab ang mga panagatan sa pag-amping aron malikayan ang disgrasya. EIM (BANAT NEWS)