Jewelry Store Gitulis Mga Alahas Gilimas

CEBU, Philippines - Nasakiyo sa mga tulisan ang kapin P100 mil nga kantidad sa silver nga alahas gikan sa usa ka tindahan sa Junquera Extension, sa barangay San Antonio kagahapon pasado alas- 9 sa buntag.

Ang J and A Wholesale Trading Fashion Accessories nga gipanag-iya ni Jujiza Tingal, molupyo sa Tabok-Canal, Pardo ning dakbayan nabiktima sa tulo ka armadong tulisan.

Sa pakighinabi sa Banat News ni SPO1 Maximo Lapa, sa Parian Police Station mibutyag nga giatol sa mga tulisan ang pagpangabli sa maong silver jewelry store.

Ang tag-iya uban sa iyang bayaw nga si Blessa Tingal nakugang sa kalit nga pagsulod sa duha ka armadong tulisan ug mideklarar og tulis ug sa kahadlok sa duha wala na sila mosukol dihang gikuha ang ilang bag ug gipanulod dinhi ang ilang mga igbabaligyang mga alahas.

Human niini daling milakaw ang mga tulisan sakay sa usa ka motor nga gimaneho sa laing lalaki nga nagpaabot sa gawas nga bahin sa maong establisemento.

Sa pakighinabi sa Banat News sa hepe sa Theft and Robbery Section (TRS), Supt. Bonifacio Garciano, mibutyag kini nga sa diha nga iyang nahinabi ang tindera mibutyag kini nga ang mga tulisan iya nang namay-ongan kay magpunay kini og balik-balik sa tindahan.

Mitug-an usab ang maong tindera nga adunay higayon nga ang usa sa mga tulisan gitawag sa iyang igsuon ug dako ang pagduda nila nga molupyo lang sa barangay San Antonio ang maong grupo.

Namatikdan usab nga ang mga tulisan nagkurog samtang ilang gihimo ang krimen.

Matud pa ni Garciano nga ila karun nga gikuhaan og cartographic sketch ang tulisan kini aron ilang masuta kun molupyo ba gayud sa maong barangay. EIM (BANAT NEWS)