Adik nga amahan miluba sa kapuyo, anak gilugos sad

CEBU, Philippines - Nadangat sa Vicente Sotto Memorial Medical Center ang usa ka ginang human kini dunggaba sa iyang kapuyo ug nasamutan ang problema sa ginang dihang ang suspetsado milugos dayon sa ilang 11-anyos nga anak sa usa sa mga barangay sa lungsod sa Balamban. Ang insidente nahitabo kagahapon sa kaadlawon dihang miabot ang suspek nga giingong hubog ug gidudahang naglutaw ang utok tungod sa ginadiling drugas.

Ang mga biktima nasalbar sa usa ka drayber sa van nga si Germano Baron kinsa nakaagi sa duha nga nagkadugo ug nagpakitabang diha sa daplin sa dalan ug maoy midala kanila sa Vicente Sotto Memorial Medical Center. Si Baron mao sad ang misumbong ngadto sa Homicide Section sa Cebu City Police Office (CPPO) kinsa maoy unang mihimo sa imbestigasyon.

Base sa imbestigasyon ni PO2 Christobal Geronimo sa CCPO, ang 47-anyos nga biktimang ginang nakaangkon og daghang samad sa dinunggaban sa nagkadaiyang parte sa lawas.

Ang maong ginang usab maoy misumbong kabahin sa paglugos sa iyang 32-anyos nga kapuyo sa ilang 11-anyos nga anak human siya dunggaba niini tungod sa ilang panaglalis kagahapon sa kaadlawon.

Ang kapolisan wala makakuha og impormasyon gikan sa 11-anyos kay matud pa wala na kini magtingog.

Matud pa sa inahan nga hubog ug nakasuyop sa ginadiling drugas ang suspek dihang naabot sa ilang balay hinungdan sa ilang panaglalis apan misanting ang ulo sa suspek ug mikuha og hait nga hinagiban dayon gidunggab ang ginang.

Dugang pa sa inahan nga pagkahuman niini pugsanon siyang gipagawas sa ilang balay ug diha-diha gilugos sa suspek ang ilang anak. Tungod sa kahubog ug sa ka sabog sa maong suspek nakatulog kini ug nakahigayon ang ginang bisan paman sa kaluya na sa iyang lawas tungod sa mga samad dinunggaban miluwas gihapon sa iyang anak ug silang duha nakaeskapo sa maong lugar hangtud nga sila naagian ni Baron.

Ang CCPO mipasa na sa maong kaso ngadto sa Balamban Police Station, ang Banat News nga mi-follow up sa maong kaso kagahapon mibutyag nga padayon pa ang ilang imbestigasyon. EIM (BANAT NEWS)