Pajo pilot area sa basura

CEBU, Philippines - Nag-una sa kampanya bahin sa tukmang paghipos sa basura ang barangay Pajo sa dakbayan sa Lapulapu nga maoy nagsilbing pilot area sa 30 ka barangay sa dakbayan sa pagpatuman sa Republic Act 9003 kon Solid Waste Manament Act of 2001.

Si Association of Barangay Council (ABC) Federation President Leo Mercado nga nahinabi sa Banat News kagahapon miingon nga naglakip sa ilang gihingusgang kampanya mao ang pag-awhag sa mga molupyo sa ilang barangay sa pagbahig sa malata ug dili malata nga mga basura.

Matud pa ni Kapitan Mercado nga matag semana ilang pasiugdahan ang clean drive sa mga sitio sa ilang barangay sa pagsiguro nga mapatuman ang hingpit nga kalimpiyo niini.

Gitataw ni Kapitan Mercado nga gihingusgan ni Mayor Paz Radaza ang pagpatuman sa tukmang paghipos sa basura sa tumong nga maangkon niini ang hingpit nga kalimpiyo sa matag barangay sa dakbayan.

Gumikan niini   nasinatian sa pipila ka opisyal sa barangay nga napasakaan usab og kaso   ang mga opisyal sa barangay nga napakyas sa pagpatuman niini.

Si Mayor Radaza nga nagpatuman sa tukmang paghipos sa mga basura ang nagmalampuson sa paghatag og kausaban sa kahimtang sa labayanan sa basura sa sitio Soong sa barangay Mactan pinaagi sa pagpahimutang sa ilang Material Recovery Facilities (MRF) nga maoy nakapausab sa kanhiay nga kahimtang sa maong lugar.

Sa sitio Soong nga kaniadto magtapok ang naglaundok nga basura ug tapokan sa daghang langaw gumikan sa dili masingo sa kabaho, sa pagkakaron limpiyo na kaayo ang maong lugar ug ang palibot gilibotan na sa mga tanom nga utanon ug uban pa.

Ang pagbahig sa madunot ug dili madunot nga basura didto na ipahiluna sa MRF diin didto usab mahikay ang paghimong basura niadtong mga malata nga basura, samtang   may mga basurang dili malata nga gigamit usab nga sagol sa semento ug uban pang proyekto sa barangay.  - BANAT NEWS