Biyahe sa SK di angay himoong isyu

CEBU, Philippines - Giklaro ni Cebu City SK Federation president John Philip Po nga dili angayang himoong isyu ang pagtambong sa iyang grupo uban sa 30 kapin ka delegado sa siyudad sa gipahigayong summer camp karon didto sa Baguio City.

Matud pa ni Po nga ang maong kalihukan gitawag og Youth for Environment Summer (YES) camp nga gipasiugdahan sa Department of Education (DepEd) ug sa Department of Environment and Natural Resources (DENR) busa lihitimo ang ilang pagbiyahe.

Dugang pa niya nga wala nakasupak ang maong kalihukan sa Memorandum Circular No. 2011-59 sa Department of Interior and Local Government sa pagdili sa mga local government unit nga mohimo og nagkadaiyang kalihukan gawas sa ilang hurisdiksyon.

Suma pa niya nga ang nagdumala sa kalihukan karon sa Baguio mao ang DepEd ug DENR busa dili sila maigo sa bag-ong memorandum sa DILG.

Matud pa ni Po, kinsa ex-officio member usab sa konseho, nga dako kaayo og matabang ang gitambongan nila karon nga seminar sa Baguio gumikan kay kalabot kini sa hustong pag-proteher sa kalikupan.

Ang nakat-onan niya sa maong seminar iyang ipaambit sa mga kabatan-onan inigkabalik niya dinhi sa dakbayan.

Ang gasto sa mga delegado sa siyudad sa Sugbo naggikan sa tagsa-tagsa nila ka panudlanan sa SK Fund sa barangay.

Nagkanayon si Po dinhi sa Banat News nga puwede kaayong makaapil ang mga opisyales sa usa ka local government unit sa mga kalihukan sa laing lugar basta dili lang sila ang nag-organisa.

Usa sa gihisgutan karon didto sa Baguio City mao ang pagtuon sa mga environmental law ug tukmang pagtubag sa nagkadaiyang emerhensya ilabi na kung moigo ang mga kalamidad sa atong dapit.

Samtang si Mayor Michael Rama mipadayag nga wala siya’y nakitang sayop sa pagbiyahe sa mga delegado sa SK sa siyudad didto sa Baguio gumikan kay usa kini ka maayong programa aron mapalapad nila ang pagserbisyo sa ilang mga konstituwente.

“Pareha ra gud sa una, kadtong naa pa ko sa Vice Mayor’s League, di ba moadto man gyud ta og laing lugar aron atong mausa og tigom ang atong mga kauban,” matud pa sa mayor.   - BANAT NEWS