Gipusil sa wa hiilhing kriminal

CEBU, Philippines - Talandugon ang kahimtang sa usa ka 43 anyos nga ulitawo human kini pusila sa duha ka wala hiilhing kriminal nga nagsakay og motorsiklo didto sa barangay Canduling, lungsod sa Ronda niadtong Lunes sa gabii.

Ang biktima mao si Franklin Andan, 43, ulitawo, ug molupyo sa nahisgutang lugar, samtang walay nakaila sa miluthang kaniya nga nagsakay sa usa ka motorsiklong walay plate number.

Si PO2 Benjie Garcia sa Ronda Police Station mibutyag nga naglakaw ang biktima sa karsada gikang misuroy dihang kalit lamang kining gihunongan sa motorsiklong gisakyan sa duha ka lalaki ug mipusil kaniya makaduha ka higayon.

Ang biktima nga naigo sa hawak nakahigayon pa unta sa pagdagan apan nalup-og kini pag-abot sa unahan ug gibiyaan kini sa mga kriminal kinsa misibat pahilayo sa maong lugar.

Ang biktima gihatud dayon ngadto sa Barili District Hospital apan gi-transfer sa Vicente Sotto Medical Center sa dakbayan sa Sugbo.

Ang kapolisan nagtuo nga panimawos ang motibo sa krimen sanglit nakahipos og kasayuran ang mga polis sa crime scene nga ang biktima nakapusil usab kini niadtong milabay’ng tuig sa ilang lugar.   - BANAT NEWS