PJ di modagan pagka-gobernador

CEBU, Philippines - Gipahibawo ni 3rd district Congressman Pablo John Garcia nga wala siyay laraw nga modagan sa pagkagobernador sa lalawigan sa Sugbo sa sunod nga eleksiyon sa tuig 2013.

Kini sukwahi sa nahaunang mga taho nga siyay mopuli sa iyang igsoon nga si Gobernador Gwendolyn Garcia kinsa anaa na sa iyang ikatulo ug katapusang termino sa pagkagobernador sa probinsiya sa Sugbo.

Gipadayag ni PJ Garcia ang maong kasayoran tungod sa pagkalambigit sa iyang ngalan sa mga taho nga matud pa siyay mokandidato sa pagka-gobernador sa lalawigan sa sunod nga piniliay.

Matud pa ni PJ Garcia nga dako kaayo ang iyang dungog nga ang iyang ngalan maoy usa sa nahimong target sa pagkagobernador tungod kay usa kini ka labing taas nga posisyon sa probinsiya sa Sugbo. Giklaro ni PJ Garcia nga ang pagkapili sa pagka-gobernador sa iyang amahan, nga si 2nd district Congressman Pablo Garcia ug sa iyang igsoong si Gwen nahimo tungod sa kadako sa ilang serbisyo nga nahimo sa lalawigan sa Sugbo.

Matud pa ni PJ Garcia nga dili siya gusto nga magpapili sa maong posisyon tungod sa ilang apilyedo nga nabaniog na sa saad nga nag-ingon "Dili sulti ang pabuhaton; apan buhat mao'y pasultihon" ug "mauwaw ta og ngalan ra'y atong gisaligan." Tungod nini, si PJ Garcia miingon nga dili siya andam sa maong posisyon sanglit ang nahimo niyang mga kalambuan sa tresiro distrito dili pa igo alang sa maong posisyon.

Dugang pa niya nga gusto siya nga magpabilin sa trisero distrito kun mapili pa siya pag-usab sa pagkakongresista sa eleksiyon sa tuig 2013.  - BANAT NEWS