Recamora mibahad Joavan di pasayloon

CEBU, Philippines - Ang bag-ong officer-in-charge sa Talisay City Police Station (TCPS) nga si Chief Inspector Eddie Recamora mibahad nga wala siya’y pilion sa pagpatuman sa balaod bisan kinsa pa ang makalapas niini bisan kun ang sinagop pa sa mayor sa dakbayan.

Si Recamora niadtong Lunes milingkod isip OIC sa TCPS puli kang Senior Inspector Errol Francis Deveyra.

Kahinumdoman nga ang sinagop ni Mayor Socrates Fernandez nga si Joavan Fernandez nagpadayon sa iyang pagpabadlong sa siyudad apan kasagaran sa iyang mabiktima maareglo lang.

Si Recamora sa pakighinabi sa Banat News kagahapon nagkanayon nga ubos sa iyang pagdumala karon sa TCPS kung magpabadlong si Joavan dili siya magduha-duha sa pag-implementar sa balaod ug pagpasaka og kaso batok sa sinagop sa mayor apan wala usab silay mahimo kung ang biktima moatras o kaha dili mopadayon sa ilang reklamo.

Matud sa OIC, nga iyang trataron sama sa usa ka ordinaryong tawo si Joavan.

Sa laing bahin, si Recamora maoy kanhi hepe sa Danao City Police Station sulod sa upat ka buwan sa wala pa siya mabalhin sa TCPS.

Matud niya nga iyang nasuta nga ang kagamhanan sa Talisay misuporta sa kapolisan aron mapalambo ang pagpatuman sa kahapsay ug kalinaw sa siyudad apan aduna siya’y daghang usbon sa sistema sa TCPS.

Ang pipila sa iyang usbon mao ang deployment sa kapolisan, pagpalig-on sa police visibility sa mga lugar nga peligro sa siyudad, komunikasyon ug mobility.

Gipasabot ni Recamora nga iyang nabantayan nga ang TCPS adunay mga resources apan kuwang sa police visibility ug ang paggamit usab sa resources wala makaabot ngadto sa optimum level.

Nasuta ni Recamora nga ang ‘crime against property” maoy kuyanap sa Talisay nga naglangkob sa tulis ug pagpangawat sa kadalanan.

Ang OIC mitandi sa dakbayan sa Talisay ug Danao diin matud niya nga ang dakung problema sa Danao mao ang pinusilay diin iyang naobserbahan sa iyang usa ka semana nga paglingkod kaniadto isip hepe sa maong siyudad nagsunod-sunod ang mga panghitabo sa pinusilay.

Matud niya nga ang mga tawo sa maong lugar dali lang makabaton og mga pusil tungod kay anaa ra sa ilang palibot ang pabrika ug barato kaayo ang presyo.

Si Recamora midugang nga sulod sa duha ka buwan niyang paglingkod isip hepe sa Danao nakontrolar niya ang maong problema sa pinusilay.  - BANAT NEWS