Na-cardiac nga naligo

CEBU, Philippines - Patay ang usa ka tawo naligo sa dagat human atakeha sa cardiac arrest ug nalumos didto sa Vano Beach Resort sa barangay Marigondon, dakbayan sa Lapulapu sa miaging Domingo sa buntag.

Ang biktima mao si Leopoldo Dalaniel, 59 , minyo nga taga dalan P. del Rosario sa barangay Sambag 1, dakbayan sa Sugbo.

Si PO2 John Carlo Jocotan sa homicide section sa kapolisan sa maong dakbayan nga nahinabi sa Banat News miingon nga kuyog sa biktima ang iyang mga kabanay ug mga silingan nga naligo sa maong lugar.

Matud pa ni PO2 Jocotan nga sumala pa sa mga kauban sa namatay nga kauban pa nila kini nga nangaon sa ilang pamahaw ug pagkahuman miuna kini og tugsaw sa dagat.

Dugang pa ni PO2 Jocotan nga samtang naglangoylangoy kini sa dagat kalit lang gibati og paghuot sa dughan ug namatikdan kini sa mga laing mga tawo nga naligo usab sa maong dapit ug dali kining gitabang.

Si PO2 Jocotan midugang nga nangayo og panabang sa mga sakop sa Emergency Rescue Unit Foundation (ERUF) ang mga kauban ni Dalaniel ug dali kining gihatod ngadto sa Mactan Doctors Hospital apan ang mga doktor nga nag-atiman mideklara niini nga dead on arrival. (WC ) - BANAT NEWS