Gilikod pagpusil patay

CEBU, Philippines - Nabuslot ang buko-buko sa usa ka construction worker human kini pusila sa wala hiilhing kriminal didto sa sitio Bumbil, barangay Lusaran, ning dakbayan sa Sugbo sa miaging adlaw.

Ang biktima nailhan nga si Eduardo Cobrado, 46, molupyo sa nahisgutang lugar ug usa ka construction worker.

Sa inisyal nga imbestigasyon sa kapolisan nasayran nga ang biktima ug ang iyang kapuyo nga si Concordia Mariquit, mibisita sa balay sa igsoon niini nga si Jucel Cobrado sa maong lugar.

Samtang nagkalingaw sila og estorya pinaagi sa cell phone sa usa usab ka igsoon niyang babaye nga si Mylinde, mihigda ang biktima sa salog nga kawayan sa balay ni Jucel.

Apan pipila ka minutos, kalit lang milanog ang buto sa armas de fuego nga nabati sa kapuyo sa biktima .

Dihang iyang gisusi, samdan na ang biktima sa buko-buko ug nabulit na sa dugo ang lawas hinungdan nga nagpakitabang dayon siya kang Jucel, ang igsoon sa biktima.

Ang biktima daling gihatod ngadto sa North General Hospital diin didto kini ideklarar nga patay na tungod sa samad sa bala sa iyang likod.

Nagpadayon pa ang kapolisan sa pagsuta kinsay miluthang sa biktima. (BANAT NEWS)