6-anyos nalumos sa dagat

CEBU, Philippines - Usa ka 6-anyos nga batang lalaki nalumos didto sa Fernandez Beach Resort sa barangay Poblacion, dakbayan sa Talisay kagahapon pasado alas 2:00 sa hapon.

Ang biktima mao si Anthony Aro, 6, molupyo ra usab sa maong lugar.

Si SPO3 Daniel Tarucan, imbestigador sa kapolisan sa maong dakbayan mibutyag sa Banat News nga ang biktima kauban sa iyang tulo ka igsoon nga sila si John Mark, 18, Teresita, 14, ug kamanghoran   nila nga si James, 4, nga mikuyog   sa nag-birthday nilang silingan nga naligo sa maong lugar.

Matud pa ni Tarucan nga sa wala pa ang hitabo, ang biktima kauban sa iyang igsoong babaye ug manghod nga lalaki nagkalingaw ug langoy-langoy sa dagat ug gani nagduwa pa sila niini.

Apan sa kalit lang natingala ang maguwang nga babaye dihang kalit lang nahanaw ang biktima hinungdan nga iyang gipahibalo ang iyang magulang nga si John Mark.

Gipangita dayon nila, hangtod nga ang laing naligo sa maong lugar nga si Jasmin Esconde maoy unang nakadiskobre niini dihang nahikapan niya ang patay’ng lawas sa bitima sa ilawom sa tubig.

Gidala dayon niya kini ngadto sa baybayon, gisuwayan pag-apply og first aid, hangtod nga gidala ngadto sa Talisay District Hospital apan wala na gyud malibre ang kinabuhi sa bata.

Matud ni Tarucan nga taga tuhod ra ang giladmon sa dagat nga gikaligoan sa biktima apan gituohang nataligam-an kini sa mga maguwang. (WC)(BANAT NEWS)