Gwen andam motabang sa CCCI

CEBU, Philippines - Subli na usab nga mohatag sa iyang financial assistance si Gobernador Gwendolyn Garcia ngadto sa Cebu Chamber of Commerce and Industry (CCCI) alang sa nagsingabot nga business month sa Sugbo.

Kini ang gipasalig sa gobernador atubangan sa bag-ong chairman sa nahisgutang buhatan nga si Virgelio “Nonoy” Espeleta atol sa ilang tigom didto sa buhatan sa gobernador sa miaging adlaw.

Kaubang mibisita sa buhatan sa gobernador mao sila si Consul Samuel Chioson, Milanie Nang, Mila Espinosa ug uban pang mga negosyante sa Sugbo.

Gipadayag ni chairman Espeleta nga aduna sila’y ubay-ubay nga mga programa sa ilang umaabot nga business month diin ang tumong niini mao ang pag-promote sa Sugbo sa natad sa industriya ug turismo.

Midugang si Espeleta nga modapit sila og dugang nga mga investor alang sa Business Process Outsourcing, ingon man ang pagpahigayon og mga seminar ug bansay-bansay alang sa mga tag-iya og mga resort and hotel aron nga labi pang magpalambo sa maayong serbisyo ngadto sa mga turista.

Midugang si Espeleta nga ang suporta nga gihatag sa CCCI sa programa ni Gobernador Garcia bahin sa pagtukod og mga comfort room sa kalungsoran.

Nunot niini mapasalamaton kaayo si Espeleta ngadto kang Gobernador Garcia sa gihatag niining ayuda kanila. (BANAT NEWS)