Mamalit og scrap gi-warningan

CEBU, Philippines - Gipahimangnoan sa pangulo sa enforcement team sa Solid Waste Management program sa dakbayan sa Mandaue ang mga mamalit og scrap sa dakbayan nga hunongon na ang ilang pagpangolekta og basura sa mga balay patigayon aron dili kini mag-atubang og kaso nga kalapasan sa Republic Act 9003 kon Ecological Solid Waste Management Act of 2000.

Ang pangulo sa maong buhatan sa dakbayan nga si Placido Jerusalem sa iyang pahimangno miingon nga hugtanon usab niyang gipasidan-an ang mga tagdumala sa nagkadaiyang pabrika o buhatan sa dakbayan nga mohunong na usab sa ilang pagpakigsabot ngadto sa mga scrap buyer sa pagkolekta sa ilang mga basura tungod kay mahimong mag-atubang sila og kaso sa ilang buhatan.

Si Jerusalem mipasabot nga ubos sa Section 48 sa paragraph 13 sa mao gihapong balaod gimando usab ang pagdili sa mga domestic helper sa paghakot sa ilang mga basura nga walay pagtugot gikan sa kagamhanan ug hangtod na sa paglabay niini.

Matud pa ni Jerusalem nga higpit karon nilang gi-monitor ang pagpanglabay sa mga basura gikan sa mga dagkong establisamento sa dakbayan ug ang hugtanon usab nga pagtuman sa giluwatan nga kamandoan bahin sa pagbahig sa madunot ug dili madunot nga basura sa dili pa ilabay ngadto sa mga basurahan. (BANATNEWS)