Mga hubog mibabag sa kapolisan gikasohan

CEBU, Philippines - Duha ka giingong mga hubog ang gipasakaan og kaso sa kapolisan sa dakbayan sa Talisay tungod sa giingong pagbabag nila sa mga polis nga mitubag og alarma sa usa ka dinasmagay sa sakyanan sa South Road Property habig sa eskina sitio Uldog ug Carmen Village, barangay Poblacion, dakbayan sa Talisay, sa milabay’ng gabii.

Ang mga suspetsado mao sila si Rodrigo Yu, 53-anyos taga sitio Hollow Block, barangay Lagtang, Talisay ug Alexander Villaremo, 56, taga Ramona Village, barangay Dumlog, sa maong siyudad kinsa didto mobabag sa mga kapolisan sa sitio Kawayan, barangay Tabunok, sa maong dakbayan.

Sayo niini si PO2 Oliver Ortega uban sa traffic enforcer nga si Joseph Neil Abella Valindres sakay sa multicab patrol car paingon untang motubag sa alarma apan giingong ang mga suspetsado nga nagsakay sa usa ka Honda XRM nga motorsiklo nagtangag sa plakang YV-4619 mibabag   sa patrol car.

Si Yu maoy giingong maoy nagmaneho sa maong motorsiklo wala gyud maminaw dihang gibadlong ni PO2 Ortega ug Valindres nga papadaplinon sa agianan apan nasuko na hinuon nganong wala kuno magwang-wang ang mga polis.

Gumikan sa ilang kalagot si Valindres ug PO2 Ortega nanawag sa headquarter ug nangayo og back-up aron sikopon sila si Yu ug Villaremo.

Sila si SPO1 Kenneth Abella, PO3 Enad, PO3 Renato Pendo, PO1 Jude Enemecio ug PO1 Pasumala daling miresponde sa maong tawag. Naabtan sa maong mga polis ang motorsiklo nga gisakyan sa mga suspetsado nga nagbabag atubangan sa multicab patrol car nga nakapalangan og usa ka oras sa kapolisan.

Ang duha nasuta sa mga polis nga pulos mga hubog tungod sa kabaho og bino sa mga gininhawa niini.

Si Villaremo giingong suko kaayo nga nagbalik-balik og singgit nga nagkanayon “mga buang mong pulisa mo?, nganong nagsige man mo og wang-wang sa gubaon ninyong multicab?, dili man gani mo makadakop ni Joavan Fernandez ang anak sa mayor sa Talisay City, nahadlok mo niya?”

Si Yu niadtong higayona nagmaneho sa motorsiklo nga wala magsul-ob og helmet ug gimandoan kini ni PO2 Ortega nga itunol ang iyang driver’s license ug rehistro sa motorsiklo apan imbes nga motuman sa mando sa polis ang duha ka suspetsado giingong misamot na hinuon og kasuko ug mibuhi na usab og dili maayong pulong nga nagkanayon “mga buang mong tanan pulisa mo, nganong dakpon man mi ninyo nga dili man gani mo makadakop ni Joavan Fernandez. Ang duha gisikop sa mga polis ug gidala ngadto sa Talisay City District Hospital ug gipaubos sa liquor test.

Ang duha ka suspetsado nakalapas usab sa Article 151 RPC kon “Serious Resistance and Serious Disobedience to a Person agent of Authority” ug Akta Republika No. 4136 kon “The Land Transportation and Traffic Code of the Philippines”.

Human masikop ang mga suspetsado si PO2 Ortega ug Valindres mipadayon sa ilang pag-imbistigar sa dinasmagay sa Toyota Corolla nga nagtangag sa plakang YHZ-736 gimaneho ni Ernesto Deiparine Jr., ug motorsiklo nga nagtangag sa plakang 3624-GN gimaneho ni Roger Dalapo.

Ang duha ka habig giingong mireklamo tungod kay usa ka oras na silang naghuwat og polis nga mohusay kanila ug giingong mibahad nga mopasaka og kaso batok sa mga polis tungod sa kadugay niining miresponde. (BANATNEWS)