22 ka tripulante gitiklo sa Bantay Dagat

CEBU, Philippines - Mokabat og 22 ka mga tripulante lakip na sa kapitan sa barkong panagatan ang nadakpan sa mga sakop sa Bantay Dagat ug kapolisan gumikan sa illegal nga pagpanagat didto sa kadagatan sa barangay Colon, siyudad sa Naga kagahapon sa alas 5:00 sa buntag.

Ang mga nadakpan maoy nagsakay sa LEA Fishing boat nga gipanag-iya sa usa ka Lodegaria Inoc, hingkod, nga taga barangay Pooc siyudad sa Talisay.

Usa kanila mao ang kapitan nga si Diodito Inoc, 51, minyo, ug igsoon sa tag-iya   nga taga Pooc usab.

Nasakmit usab sa kapolisan ang ilang lantsa nga panagatan ug duha ka gagmay’ng pumpboat nga panagatan.

Pipila sa mga tripulanteng nadakpan mao sila si Eddie Arcayos, Ryan Lopez, Bebot Avila, Emmanuel Murillo, ug Eric Ipo, pulos hingkod ug pulos usab taga isla sa Camotes.

Samtang ang laing walo ka tripulante pulos usab taga dakbayan sa Talisay.

Si PO1 Rongie Nadora sa Naga City Police mibutyag sa Banat News nga ang mga sakop sa Bantay Dagat nagpatrolya sa kadagatan sa Naga niadtong higayona dihang nasigpatan nila ang maong lantsang panagatan nga nagguyod usab og duha ka pumpboat   samtang nanagat sa kadagatan sa Colon.

Gawas sa mga sakyanan, lakip usab nga gisakmit sa kapolisan ang tulo ka nagkalain-laing klase sa pukot apan gamay lang nga isda ang nasakmit sa kapolisan gikan kanila. Ang mga pumpboat kasamtangang gipugngan sa kapulisan samtang ang mga nadakpan gitanggong na sa prisohan. (WC) (BANATNEWS)