CEBU, Philippines - Anaa sa kritikal nga kahimtang ang usa sa duha ka lalaking gipamusil didto sa sitio Dita, barangay Pulangbato, dakbayan sa Sugbo kagahapon sa alas 9:00 sa buntag.
Ang mga biktima mao sila si Fernan Jugadora, 33, ulitawo, walay trabaho, nga taga Greenwood Subdivision sa nahisgutang barangay ug Rolly Tautohan, 38, minyo, taga sitio Gabasan sa barangay Tigbao ug drayber sa habal-habal.
Si Tautohan maoy anaa sa talandugong kahimtang kay nasabak kini sa upat ka mga bala diin usa niini sa iyang walang kilid.
Samtang ang suspek nga si Howel Tumulak, 24, ulitawo, walay trabaho nga taga Pulangbato mitahan dayon sa kapolisan uban sa .45 kalibreng pistola nga gigamit niya sa pagpamusil
Subay sa pasiunang imbestigasyon ni PO2 Jodan Batucan ug mga kauban sa Homicide Section nasayran nga naghigda-higda ang mga biktima sulod sa piggery nga gipanag-iya ni Junior Bontuyan.
Dihang nakit-an sila sa suspek gipamusil sila nga walay igong hinungdan, apan mibutyag ang suspek ngadto sa kapolisan nga dugay na siyang nagdumot sa duha.
Kini tungod kay mga tulo ka bulan na ang nakalabay samtang sila nagsugal og hantak didto sa Pulangbato miduol ang mga biktima ug nagsamok-samok ug gikuha ang ilang pusta sa hantakan.
Kagahapon si Tumulak gipailawom na sa paraffin test sa buhatan sa CSIU. (WC) (BANAT NEWS)