"Robinhood" nadakpan sa cordova
CEBU, Philippines - Nadakpan sa kapolisan ang giilang ‘Robinhood’ nga drug pusher sa sitio Matab-ang, barangay Day-as sa lungsod sa Cordova, alas- 3 pasado ang takna sa miaging kaadlawon ug nakuhaan og mga pinaketeng gituohang shabu ug salapi.
Ang nadakpan mao si Estaneslao Yap Jr., 27, nagpuyo sa maong dapit kinsa nadakpan nila ni Inspector Jonas Tahanlangit, hepe sa kapolisan sa maong lungsod pinaagi sa search warrant nga giluwatan ni Judge Meinrado Paredes sa Regional Trial Court (RTC) 7.
Si PO1 Ryan Casiban sa kapolisan sa maong lungsod nagkanayon nga sa pagronda sa panimalay sa suspetsado nasakmit ang duha ka dagkong pakete ug 35 ka mga gagmay nga pakete nga pulos gituohang ang sulod gidudahang shabu, salapi nga P2,840 ug mga kahimanan sa paggamit niini.
Matud pa ni Casiban nga gironda na kaniadto ang panimalay sa maong suspetsado sa mga sakop sa Philippine Drug Enforcement Agency (PDEA) 7 ug nag-atubang na usab kini og kaso hinungdan nga aduna kini pending nga warrant of arrest nga giluwatan ni Judge Torebio Quiwag kaniadto sa RTC 7 sa dakbayan sa Lapulapu. Si Casiban miingon nga ang mga silingan sa suspek nga ilang napangutana mibutyag nga matinabangon kini kanila, kini maoy hinungdan nga sagad sa mga operasyon batok niini mapalpak sanglit pulos mangambot ang mga molupyo.(/EIM) (BANAT NEWS)
- Latest
- Trending
