Sanchez namatay sa kanser

Ang patay’ng lawas sa bise-gobernador kasamtangan nga gipahimutang sa Crystal Palace nga nahimutang sa Nivel Hills barangay Busay ning dakbayan.

Si Sanchez usa ka civil engineer ug contractor sa dihang wala pa siya mahimong politiko. Siya lumad nga taga Tuburan diin siya mitapos sa iyang elementarya ug high school.

Niadtong 1988 siya natudlong board member, 1992 midagan siya sa pagka-bise gobernador apan napildi, subling midagan pagka-bise gobernador niadtong 2004 ug midaog.

Ang inahan sa lalawigan sa Sugbo Gov. Gwendolyn Garcia, mipadangat sa iyang masulob-ong pagbati sa kalit nga pagpanaw sa bise-gobernador.

“We would like to extend to the bereaved family of Vice-Governor Greg Sanchez our deepest condolences as we pray for the eternal repose of his soul,” matud pa ni Garcia.

Samtang sugod kagahapon adlawa gipagawas ang executive order nga mamahimong half-mast ang Bandila sa nasud diha sa Kapitolyo agi og pagbangutan sa namatay’ng bise-gobernador.

Matud pa ni Garcia nga magpabilin kini sulod sa unom ka adlaw kini base sa balaod sa Republic Act 8491.

Samtang nakigkoordinar na usab ang buhatan sa gobernadora ngadto sa legislative office kalabot sa ilang pagabuhaton nga solemniya isip pagbangutan sa kamatayon sa bise-gobernador.

Samtang gihandom ni Garcia ang mga higayon nga sila pa ang nagkakuyog sa kampanya ni Sanchez, gani nakita sa gobernador nga nagkahiusa ang legislative ug executive niadtong tungura.

“I worked with him when he was with One Cebu (party) and in fact I run with him in my second bet for my second term he was my vice governor and during those times we saw cooperation between legislative and executive,” pasabot pa sa gobernadora.

“I would like to make a statement for those of us who are left in this world when one passes on, let us stop trying to dig up all this rancor, bitterness and hate. The late Vice Governor has passed on, let us also contribute to giving peace to his soul and remember the good things that he did when he was still with us, because I still believe in Cebuanos decency that applies all sectors including the media,” pasabot pa sa gobernadora.

Butyag usab sa gobernadora nga wala pa siya maka-estorya sa pamilya sa namatay’ng bise-gobernador apan matud niini adunay tukmang panahon alang niini.

Si Garcia ug Sanchez nagkabuwag sa ilang maayong relasyon gumikan sa nagkasunging baruganan sama sa katungod ni Sanchez isip pangulo sa Hunta Probinsiyal pagbuhat sa iyang appointing powers, ang isyu sa kontrobersyal nga Balili deal ug uban pa.

Walay kabanay sa mga Sanchez nga miatubang sa media kagahapon apan nasayran nga ang inisyal nga nadesisyonan sa pamilyang Sanchez sa adlaw sa lubong kini himuon sa umaabot nga Mayo 7.

Sa report sa DyAB mibutyag si Ferliza Contratista, ang usa sa mga sinaligan sa bise-gobernador nga kada gabii adunay ipahigayon nga Santos nga Misa.

Si kanhi Cebu Archbishop Ricardo Cardinal Vidal kinsa nakabisita sa nagmasakitong si Sanchez ug nakabendisyon niini nanawagan sa publiko nga iampo ang kalag sa maong opisyal ug hunungon una ang political wars.

Si Cebu Archbishop Jose Palma sa iyang bahin nagkanayon nga iampo niini ang kalag sa mitaliwang opisyal ug nanawagan sa katawhan sa paghimo niini pahinungod kang Sanchez.

Samtang si Glenn Soco sa report sa TV Patrol Central Visayas, ang nakaatbang ni Sanchez sa pagka-bise gobernador sa nakalabay’ng piniliay ug adunay election protest nga gisang-at batok kang Sanchez, mipadayag nga makapahuway sa kinabuhing dayon ang kanhi kaatbang sa politika. (EIM) (BANAT NEWS)