Rama mangunay og inspeksiyon sa kabalayan
CEBU, Philippines - Molibot ug mopahigayon og door-to-door nga pagbisita si Mayor Michael Rama sa mga panimalay sa nagkadaiyang barangay sa habagatang distrito sa siyudad sa Sugbo ugmang adlawa aron hingusgan ang kampanya sa “No Segregation, No Collection Policy”.
Personal gyud nga duolon ni Rama ang mga tagbalay aron pahimangnoan sa nahisgutang polisiya ug sa susamang higayon, pasalamatan usab kadtong mga residenteng mikooperar sa nahisgutan nga kampanya sa siyudad.
Nagkanayon ang mayor nga importante kaayo ang pagpatuman sa Solid Waste Management Act aron hingpit nga malimpiyo ang dakbayan sa Sugbo.
Bisitahon usab sa mayor ang nagkadaiyang subdivision ug mga simbahan aron sutaon kun mituman ba sila sa saktong pamaagi sa paglabay sa basura.
Human sa habagatang bahin sa Sugbo, gikatakda usab nga isunod dayon ang pagbisita sa mayor sa mga lugar sa amihanang distrito.
Pabilin nga istriktuhon ang pagsulod sa mga garbage truck sa composting site sa Inayawan gumikan kay susihon gyud kini sa mga environmental officers kung mibahig ba sila sa ilang mga basura.
Ang paglapas sa City Ordinance 2031 makamulta og P500 ngadto sa P1000. (BANATNEWS)
- Latest
- Trending
