Koreano nakuhaan og Marijuana

CEBU, Philippines - Usa ka Koreano nga duha palang ka adlaw nga naabot dinhi sa Sugbu anaa karun sa bilanggoan human siya nadakpan sa Regional Intelligence Division (RID)-7 human kini naaktuhang mipalit og pinaugang marijuana sa lungsod sa Cordova sa miaging alas-10 pasado sa gabii.

Ang nadakpan mao si Kim Min Su, 34, kasamtangang nagpuyo sa balay sa iyang higala diha sa Collin Wood Subdivision sa barangay Basak sa dakbayan sa Lapulapu.

    Si Supt. Glenn Sinco, luyo-luyong hepe sa RID mitug-an sa mga tigbalita nga nianang alas-3 sa hapon ang tropa dunay gimonitor nga wanted person diha sa dakbayan sa Lapulapu ug lungsod sa Cordova.

Pagkagabii ang iyang mga sakop nakadawat og impormasyon gikan sa ilang asset nga sakop sa Barangay Intelligence Network (BIN) nga dunay transaksyon sa ginadiling drugas diha sa Recreation Center sa barangay Poblacion sa nahisgutang lungsod diin ang pusher nagpaingon nga nagsakay og habal-habal.

Matud ni Sinco giadto dayon nila ang maong dapit ug ilang naaktuhan ang transaksyon apan nakabantay ang mga tawo hinungdan nga nag-iyahay sila sa pagpanagan lakip na ang giingong pusher nga nagsakay og habal-habal.

Apan si Su maoy nakuptan sa mga awtoridad ug nakuha sa iyang posisyon ang dakong plastic nga dunay sulod nga dahon sa pinaugang gituuhang marijuana ug kwarta nga P2,500 nga mao unta’y iyang ibayad ngadto sa nakaipsot nga pusher.

Matud ni Sinco base sa gitug-an kaniya ni Su nga mahal kaayo ang marijuana didto sa South Korea.

“Siguro parang kunsumo (suspek) pero out of curiousity malaking bulto (marijuana),” sumala pa ni Sinco.

Si Su miabot dinhi niadto pang Abril 25 gikan sa Korea kuyog iyang Filipina nga asawa ug duha ka mga anak.

Kasong kalapasan sa Article 2 sa Republic Act (R.A) 9165 sa section 11 ang giandam sa RID nga ilang ipasaka batok kang Su.

Matud ni Sinco ang marijuana ila pang iduso ngadto sa PNP Crime Laboratory alang sa eksaminasyon niini. (BANATNEWS)