Wanted napusilan

CEBU, Philippines -   Usa ka giingong wanted sa siyudad sa Toledo ang napusilan sa kapolisan human giingong misuway og sukol sa mga polis nga midakop kaniya sa usa ka diskohan atol sa kapistahan didto sa sitio Hikapon barangay Climaco sa maong siyudad niadtong Miyerkules sa alas 11:30 sa gabii.

Ang suspek nga nakaangkon og mga pinusilan sa paa, tiil ug kamot mao si Sonny Boy Silgas, 35, molupyo sa sitio New Bucao barangay Climaco kinsa adunay duha ka warrant of arrest sa kasong murder ug reckless imprudence resulting in homicide.

Matud ni SPO4 Gil Lastimosa, desk officer sa Toledo City Police dihang nahinabi sa Banat News adunay mipahibalo kanila kabahin sa presensya sa maong wanted diha sa maong diskohan.

Daling miresponde ang kapulisan pinangulohan ni Sr. Insp. Rolly Lauron apan dihang ilaha kining giduol misuway hinuon kini og bunot sa giluklok nga armas hinungdan nga napugos og pusil ang mga polis kaniya.

Ang suspek naigo sa iyang paa, kamot ug tiil hinungdan nga nadakpan ug nakuha gikan sa posesyon niini ang kalibre .357 nga armas nga dunay upat ka buhing bala.

Daling gihatud sa Toledo City District Hospital ang suspek aron patambalan apan gibalhin sa Vicente Sotto Memorial Medical Center (VSMMC) dinhi sa dakbayan ug nagpabilin pa karung nalandig nga gibantayan og polis.(EIM) (BANAT NEWS)