Pamaagi sa KEPCO pagwagtang sa abog gihangop

CEBU, Philippines -  Mga opisyal sa Korean Electric Power Corp. (KEPCO)-SPC Power Corporation (KSPC) mipresentar kagahapon sa buntag sa ilang gibuhat nga mga preventive measures sa planta aron dili sila makahatag og kahasol ngadto sa mga residente sa lugar ug dili makadaot sa kalikupan.

Ang maong planta nahimutang diha sa barangay Colon, dakbayan sa Naga personal nga gisusi ni Gov. Gwendolyn Garcia ug Mayor Valdemar Chiong uban sa mga sakop sa media.

Partikular nga gisusi kagahapon mao ang coal yard nga maoy gihimong tambakan sa coal nga unang gireklamo sa mga residente nga nakamugna og abog ug nameligro silang masakit.

Kahinumduman usab nga si Garcia ug Chiong miisyu kini og managlahing cease and desist order sa paghakot sa mga coal ash apan nalibkas ang maong cease and desist order dihang ang technical personnel sa planta misumitir sa ilang plano pagpahimo og dugang preventive measures kabahin sa permanenteng pagkontrolar sa coal dust o abog.

Usa sa ilang gihimong preventive measure mao nga ang palibot diha sa coal yard gitabonan og mga blue plastic sheet nga dunay unom ka metros nga barog aron ang abog dili makagawas. Ang mga conveyor gibutangan usab og mga steel plates ug ang mga building diha sa coal yard gipangbutangan nila og mga galvanized iron sheets ug cyclone wire ug mga nets sa ibabaw.    

Si Reinerio Lastimoso, KSPC General Manager for Community, Public Relations and Environment mibutyag nga 160 ka mga trabahante ang nagtrabaho karon aron madali ang pagtabon diha sa palibot sa coal yard.

Gawas niini matud niya nga ang palibot sa coal yard gipangtamnan na nila kini og mga kahoy ug gani mikabat na sa 100 ka mga kahoy ang ilang natanom.

Duna usab silay lima ka tangke nga maoy pundohan sa hugaw nga tubig ug ang maong hugaw nga mga tubig ipaubos kini sa waste water management aron magamit og bisibis diha sa palibot ug pamubo sa mga tanom.

Gipasabot usab ni Lastimoso nga nagbase usab sila sa mga pagtuon kabahin sa pagbutang nila og ekipo o tubo diha sa dagat aron dili madaot ang marine life.

Ang tubig sa dagat diha duol sa planta nga makitang magbuwa-buwa kini tungod sa pressure sa bomba sa tubig ug wala kini magbokal-bokal sa kainit. Ang tubig sa dagat maoy gigamit nilang ipabugnaw sa makina sa planta.

Kabahin sa saba sa makina aduna usab silay gipamutang nga silencers aron dili makagawas ang kusog nga tingog sa andar niini.

Sa laing bahin, si Garcia nagkanayon nga natagbaw siya sa gihimo sa maong planta.

Matud pa niya gituman niya ang saad sa pagpauswag sa Sugbo apan ang usa ka lugar dili mahimong magmauswagon kung walay enerhiya o kuwang sa enerhiya.

Si Mayor Chiong nagkanayon nga misuporta sila sa pagpatukod sa nahisgutang power plant diha sa ilang lugar apan sama sa gobernadora dili usab sila gustong masakripisyo ang mga residente diha sa iyang dakbayan tungod kay alang sa kaayohan sa katawhan ang tumong nilang kauswagan. (/EIM) (BANAT NEWS)