Tulo ka sakyanan nagkarambola napulo naangol

CEBU, Philippines -  Napulo ka pasahero ang nangaangol apil na ang drayber nga maoy nagrabihan human mabalian og tuong batiis dihang nagkarambola og bangga ang tulo ka sakyanan diha sa barangay Yati lungsod sa Liloan kagahapon sa alas 6:00 pasado sa buntag.

Ang mga sakyanan nga nagkabangga mao ang passenger multicab nga nagbiyahian sa Liloan paingon sa siyudad sa Mandaue nga gimaneho ni Rene Dogomeo Agbona,40, taga barangay Tabok siyudad sa Mandaue.

Ang ikaduhang sakyanan mao ang Isuzu 10-wheeler truck nga gimaneho ni Esmael Betalmos Pojas, 36, taga Inabanga sa lalawigan sa Bohol.

Samtang ang ikatulo nga nalambigit sa bangga mao ang Dedon service bus nga gipanag-iya sa Dedon Manufacturing nga nagbase sa Pagsabungan siyudad sa Mandaue nga gimaneho sa usa ka Rosidek Ursal, si Ursal gikatahong maoy nagrabehan sa maong aksidente tungod sa pagkabali sa batiis niini.

Samtang ang iyang mga pasahero nga pulos kawani sa Dedon Manufacturing nga nangaangol mao sila si Rolito Caliao, 41, taga Katambisan lungsod sa Catmon; Gil Caputulan, 33, molupyo sa lungsod sa Carmen; Rowen Ariola, 39, taga Compostela; Pablo Justo,27,taga Jubay Liloan; Ernilito Reyes, 39, taga Bagatayam, Sogod; Christopher Dalogdog, 35, taga Dancar Danao City; Fernando Dalogdog, 42, taga Dancar Danao City ug Carol Torres, 42, taga Sabang Danao.

Matud ni PO2 Teogenes Flores Jr., traffic investigator sa Liloan Police station dihang nahinabi sa Banat News base sa imbestigasyon ang tanang mga sakyanan pulos paingon sa siyudad sa Sugbo nga direksiyon.

Gikatahong ang pasaheroang multicab maoy nag-una, nagsunod ang Isuzu 10-wheeler truck ug nagsunod ang maong service bus.

Matud pa nga kalit nga milugar ang nag-unang multicab aron unta pag pick up og pasahero hinungdan nga daling mi-brake ang nagsunod nga trak.

Apan wala makabantay ang nagsunod nga service bus sa kalit nga paghunong sa maong trak ug uwahi nang nakatamak sa brake si Ursal hinungdan nga giungad niini ang luyong bahin sa maong trak. Tungod sa kakusog sa pagbangga nadusmo usab ang trak sa gisundang multicab. Wala hinuoy nangaangol sa mga luwan sa trak ug sa multicab.

Apan sa habig sa service bus, giingong napiit si Ursal samtang nangalamba sa atubangan ang mga pasahero niini nga maoy nakaingon sa ilang mga bun-og. Daling gihatud sa ambulansiya ang mga nangaangol nga luwan service bus ngadto sa Vicente Sotto Memorial Medical Center. (EIM)  (BANAT NEWS)