CEBU, Philippines - Namatay ang usa ka Norwegian national human mabuak ang ulo niini kay gawas nga walay helmet, hubog nga mipadagan sa iyang motorsiklo hangtod nga nalamba didto sa sitio Panas, barangay Suba Basbas, dakbayan sa Lapulapu sa miaging hapon.
Ang namatay mao si Bjornt Tore Olsen, 59, minyo nga lumad nga taga Norway ug kasamtangang nagpuyo sa Hillvil sa barangay Pajac, sa maong dakbayan.
Si PO3 Dioscoro Arong sa traffic division sa Lapulapu City Police Office (LLCPO) miingon nga gikan sa usa ka imnanan sa barangay Marigondon ang biktima kuyog sa laing Norwegian national nga si Eric Hansen nga nagtagsa og sakay og motorsiklo paingon sa lungsod sa Cordova.
Matud pa ni PO3 Arong nga kusog nga nakapadagan ang duha ug naglumba kini subay sa maong dalan apan sa paghidangat sa maong lugar kalit lang nawad-an sa panimbang ang biktima ug nalamba kini sa daplin sa karsada.
Gumikan kay walay helmet wala makasukol ang iyang ulo sa hait kaayong mga bato sa dapit diin kini maugbok nga maoy mibuak sa iyang bagol-bagol.
(BANAT NEWS)