Cardinal Vidal molarga sa Roma

CEBU, Philippines - Gitakdang molarga ugma paingon ngadto sa Roma si Cebu Archbishop Emeritus Ricardo Cardinal Vidal aron tambongan ang makasaysayanong “beatification” ni anhing Pope John Paul II sa umaabot nga Mayo l, 2011.

Si Vidal lima ka adlaw nga magpabilin didto sa Vatican City sa Roma alang sa gikatakdang beatification nga gilaumang tambungan sa kapin duha ka milyon nga mga Katoliko gikan sa nagkadaiyang bahin sa kalibotan.

Ang beatification liturgy ni Pope John Paul II naatol usab sa “Divine Mercy Sunday” ang misa nga gimugna usab sa kanhi Santo Papa sa wala pa siya motaliwan niadtong Abril 2, 2005.

Ang Archdiocese sa Sugbo nagkanayon nga mahinungdanun alang sa mga Sugbuanon ang pagsaulog ug paghangop sa pagkahimong santos ni Pope John Paul II kinsa nahimong suod sa kasingkasing sa mga Katolikong Sugboanon.

Kahinumdoman nga niadtong tuig 1981, duha ka adlaw nga miistar dinhi sa Sugbo si Pope John Paul diin gidugokan ang iyang gipahigayong misa didto sa karaang Lahug airport.

Si Pope John Paul II mao usab ang responsable sa pagtudlo kang   Vidal sa pagka- Cardinal niadtong tuig 1985.

Sa laing bahin, gipahibalo sa Archdiocese sa Sugbo nga usa ka espesyal nga misa nga giulohang “Mass for Workers” ang ipahigayon sa susamang adlaw sa beatification ni Pope John Paul II.

Ang maong misa himoon sa alas-2:00 sa hapon sa Sto. Rosario Parish Church sa Brgy.San Antonio, ning syudad sa Sugbo.