Kadaugan gidugok sa tawo

CEBU, Philippines - Gihugopan sa daghang mga tawo ang reenactment sa Kadaugan sa Mactan karong tuiga nga gibuksan kagahapon sayo sa buntag pinaagi sa usa ka balaang misa ug paghalad og pongpong sa mga bulak sa dakong rebulto ni Lapulapu nga nahimutang sa Mactan Shrine sa barangay Mactan sa maong dakbayan.

Si Mayor Paz Radaza maoy nangulo sa mga mitambong sa maong kalihokan uban sa mga sakop sa konseho sa dakbayan ug mga barangay kapitan sa 27 ka barangay sa dakbayan.

Si Department of Tourism (DOT) 7 Regional Director Rowena Montecillo maoy lakip sa mga mitambong sa maong kalihokan uban usab sa uban pang mga opisyal sa mga ahensiya sa kagamhanan sa Sugbo.

Hinuon si Kongresista Arturo Radaza wala makatambong sa maong kalihokan sanglit atua man kini sa gawas sa nasud nga nagpatambal sa kakulian sa iyang lawas nga iyang gihambin dihang nasinati niini ang aksidente sa sakyanan niadtong tuig 1980. 

Sa pamahayag ni Mayor Radaza atol sa maong kalihokan iyang gidasig ang mga molupyo ug mga nanambong sa maong tinuig nga aktibidad nga angay kining ipasigarbo gumikan sa kadaugang naangkon sa mga Pilipino batok sa misulong nga mga langyaw nga gipangulohan ni Ferdinand Magellan, niadtong Abril 27, 1521.

Human sa maong pamahayag ni Mayor Radaza gisugdan dayon ang pasundayag sa paghimo og buhing paghulagway sa panagsangka tali ni Datu Lapulapu ug Magellan.

Sa pagpasundayag sa makasaysayanong panghitabo ilang gipakita ang pagpanglupad sa mga pana ug bangkaw ug gipanauban usab ang mga payag didto sa kabaybayonan ug pagatpatang bahin sa isla sa Mactan.

Samtang nanglupad ang mga pana ug pagpanunog sa mga payag, nagsugod usab og tinigbasay sa ilang mga espada si Lapulapu ug Magellan nga mao usab ang gibuhat nga sambunot sa ilang masigkasakop nga mga pundok.

Unya taud-taod nakita dayon ang pagpanghay-ad ug pagpangligdas sa baybayon uban ang pagbanaw sa kaugalingong dugo sa mga mga biktima ug usa kanila mao ang bantugang lider sa mga Katsila nga si Magellan nga gipatay ni Lapulapu.

Samtang gumikan sa kadaghang misaksi sa maong makalingaw nga kalihokan, nalusno ang bantawan o stage sa dapit nga gihimoan sa maong pasundayag apan walay mga kinabuhing nakalas o kaha naangol.

Sa katibuk-an gihulagway sa kapolisan nga malinawon ang gipahigayong Kadaugan sa Mactan. (BANAT NEWS)