Pagpanakop batok sa badlungong motorista sa Lapulapu gitahas sa LCPO

CEBU, Philippines -  Dumalaon na sa kapolisan sa Lapulapu ang pagpanakop sa mga malapason nga mga drayber sa dakbayan sa Lapulapu human si Mayor Paz Radaza miluwat og usa ka Executive Order bahin niini.

Ang maong kamandoan nagpasabot nga dili na ang City Traffic Management System o CTMS ang makapatuman og enforcement aspect sa mga balaod sa trapiko.

Hinuon matud pa ni Radaza nga magpabilin gihapon ngadto ni Frank Brazil CTMS Director ang Operations ug Administrative aspect sa CTMS.

Gipasabot ni Radaza mas maayo nga adunay koordinasyon ang kapolisan ug CTMS sa pagpatuman sa balaod trapiko sa dakbayan sa Lapulapu sanglit adunay katakos ang kapolisan sa pag-imbestigar sa mga disgrasya sa kadalanan.

Gipanghimakak ni   Radaza ang taho nga gumikan sa nahitabong daghang reklamo sa mga motorista atol sa pagpahigayon sa Great Lapulapu Run sa milabay’ng Domingo ang hinungdan sa pagtugyan sa enforcement aspect sa CTMS ngadto sa kapolisan.

Samtang sa pakighinabi sa Banat News ngadto ni Brazil kini wala mopakita og pagsupak sa executive order ni Radaza. Si Lapulapu City Police Office Director Sr. Supt. Anthony Obenza sa iyang bahin nalipay sa maong kalambuan aron adunay maayong relasyon ang iyang mga sakop sa Traffic Division ug sa CTMS sa mga balaod nga ilang ipatuman sa kadalanan sa dakbayan sa Lapulapu (BANAT NEWS)