Naguol tungod sa kaso sa iyang anak lolo naghikog

CEBU, Philippines -  Tungod sa tumang kaguol sa nagsapaw sapaw nga problema ug kauwawan sa pamilya usa ka lolo ang gituohang naghikog ug nabaho na dihang nakit-ang nagbitay ubos sa kahoy nga tugas sa umahan niini sa sitio Tab-an barangay Karidad lungsod sa Tuburan niadtong Martes sa alas 5:00 sa buntag.

Ang napalgang patay mao si Anastacio Agsoy Sr., nagpuyo sa maong lugar.

Matud ni SPO3 Carlo Canseko, imbestigador sa Tuburan Police Station dihang nahinabi sa Banat News subay sa imbestigasyon niadto pang Domingo sa alas 6:00 sa buntag nananghid nga molakaw si Agsoy paingon sa umahan niini apan niabot nalang ang hapon wala gyud kini mopauli hinungdan nga nakahukom ang mga apo nga sila si Janice ug Rowena Agsoy ug mga anak nga si Nathaniel ug asawa nga si Marjorie pagpangita apan wala gyud nila kini makit-i hinungdan nga nakahukom nalang sila nga mamauli.

Apan pagka Martes sa buntag subli nila kining gipangita didto sa umahan ug didto nila kini nakit-an nga nagbitay na ilawom sa puno-an sa tugas nga nagtakin pa sa sundang.

Gituohan ni Canseko nga naguol ang biktima tungod kay ang usa sa iyang anak nga tanod nga si Anastacio Agsoy Jr., ang nagtagotago human nag-atubang og kasong pagpanglugos sa usa ka 16-anyos. Dugang nahipos nga impormasyon sa kapulisan nagproblema usab ang biktima tungod kay nihangyo ang anak niining wanted nga mao nalang kini ang manubag sa salaod nga iyang nahimo ug maoy magpabilanggo.(EIM)(BANAT NEWS)