CEBU, Philippines - Sa pagsaulog sa Labor Day karong Mayo 1, 2011 ang Department of Labor and Employment (DOLE) adunay mga kalihukan nga ipahigayon dinhi sa lalawigan.
Sa alas 6:00 sa buntag sa maong adlaw ipahigayon ang caravan ug fun run nga langkoban sa nagkalain-laing Tripartite Industrial Peace Council (TIPC). Ang caravan magsugod sa dakbayan sa Lapu-Lapu paingon ngadto sa dakbayan sa Talisay ug anha magtapok ang mga mosalmot sa Lapu-Lapu City Hall.
Ang taga Mandaue anha magtapok sa UCLM samtang ang taga hotel, resort, restaurant ug tourism nga caravan anha mag-abot sa Raddison Blue. Ang Cebu City caravan anha magpundok sa Department of Education (DepEd).
Ang LTCE caravan anha magtapok sa Cebu Institute of Technology ug ang Talisay caravan anha mag-abot sa East Visayan Academy sa barangay Bulacao, Talisay.
Si manlalaban Roy Buenafe sa DOLE nga nahinabi sa Banat News kagahapon nagkanayon nga sa pagsaulog unya sa Labor Day adunay ipahigayong duha ka local job fair, ug usa usab ka overseas job fair. Ang duha ka local job fair ipahigayon sa SM City mall sa North Reclamation area, dakbayan sa Mandaue ug Cebu International Convention Center (CICC).
Ang kagamhanan sa probinsiya sa Sugbo maoy mipaluyo sa nahisgutang mga job fair nga magtanyag og 2,500 ka mga bukas nga mga trabaho.
Ang overseas job fair anha ipahigayon sa Cebu City Sports Complex sa dakbayan sa Sugbo diin ang kagamhanan sa siyudad maoy mipaluyo niini ug mga 7,000 ka mga kawani ang gikinahanglan. Sa laing bahin, si manlalaban Buenafe nagkanayon nga karong adlawa (Huwebes) ang Regional Tripartite Wage and Productivity Board (RTWPB) mopahigayon og tigom aron tukion ang gidusong petisyon sa Associated Labor Union (ALU)) bahin sa P100 nga usbaw matag adlaw sa minimum nga suholan sa mamumuo dinhi sa Central Visayas.
Ang Alyansa sa mga Mamumuo sa Sugbo o AMA-Sugbu-KMU miawhag sa pagpatuman sa P125 nga usbaw sa suholan sa tibuok nasud. Si Wenceslao Badayos, chairman sa Ama-Sugbo nagkanayon nga tungod sa walay puas nga pagsaka sa mga nag-unang palaliton ug serbisyo angayan nga ipatuman ang nahisgutang usbaw sa suholan.
Matud usab niya nga tungod usab sa padayong pagsaka sa presyo sa lana misamot ang kalisud sa kahimtang sa pamuyo sa mga mamumuo tungod kay dili na paigo ang ilang inadlaw’ng sweldo. Ang inadlaw nga minimum nga suholan karon P285. (BANAT NEWS)