Gwen midayeg sa Badian Police

CEBU, Philippines -  Gidayeg ni Gobernador Gwendolyn Garcia ang kapolisan sa lungsod sa Badian tungod sa pagpangibot nila sa 3,090 ka mga hingkod nga mga punuang marijuana didto sa Barangay Basiao, usa sa bukirang bahin sa lungsod sa Badian niadtong Marso 24, 2010.   Kini bisan pa man kun nahiatol kadto sa Semana Santa diin ang kapolisan sa Badian mituman gyud sa ilang katungdanan sa pagronda sa usa ka luna sa barangay Basiao nga gihimong plantasyon sa marijuana.

Ang gobernador personal nga misusi sa mga punoan sa marijuanang nalarot sa kapolisan atol sa pagbisita iglesia niya sa 21 ka mga simbahan sa kalungsuran sa habagatang bahin sa lalawigan sa Sugbo niadtong Huwebes Santo.

Uban sa gobernador sa pagsusi sa nahisgutang mga tahom mao sila si Badian Mayor Robbert Librando ug ang hepe sa kapolisan sa Badian Police Station nga si Chief Insp. Timmar Tomio Alam.

Matud pa ni Police Chief Inspectror Alam nga ilang nadiskobrehan ang plantasyon ang marijuana didto sa Barangay Basiao, hinungdan nga gipaubos nila sa monitoring ang maong lugar sa wala pa sila molusad og operasyon batok sa ginadiling mga tanom.

Hinuon gihulagway ni Police Chief Inspector Alam nga dili grabe ang maong kaso didto sa iyang area of responsibility gumikan sa ilang pagkamabinantayon. (BANAT NEWS)