Ahente sa softdrink natulisa'g P15 mil

CEBU, Philippines -  Kapin P15 mil ang nasakiyo sa mga tulisan gikan sa usa ka ahente sa kompaniya sa softdrink ug sa tag iya   sa usa ka tindahan didto sa barangay Inayagan siyudad sa Naga niadtong Martes sa alas 4:00 sa hapon.

Ang biktima mao si Clint Conception, 30, minyo, nga taga Ward-2 lungsod sa Minglanilla , kinsa salesman sa Pepsi Company, ug Marilou Ong nga tag-iya sa usa ka convenient store.

Duha ka mga batan-on ang mga tulisan nga misakiyo sa P15 mil nga gisulod sa bag ni Conception nga iyang koleksyon niadtong higayona, samtang P600 ang kang Ong nga halin sa iyang tindahan.

Si PO1 Rongie Nadora, desk officer sa Naga City Police Station dihang nahinabi sa Banat News mitug-an nga ang mga biktima didto sa sulod sa tindahan ni Ong dihang kalit lang miabot ang mga tulisan dayong tion sa ilang mga armas ug mideklarar nga tulis .

Ang mga biktima kinsa pulos nakalitan wala makalihok ug gitunol lang dayon ni Conception ang iyang bag nga gisudlan sa Pl5 mil nga cash ug mao usab si Ong mitunol sa iyang halin nga P600.

Ang mga tulisan misibat dayon ug mipahilayo sa maong lugar ug gipangita na karon sa kapolisan.(WC) (BANAT NEWS)