CEBU, Philippines - Ang migradwar nga magna cum laude sa University of San Carlos sa kursong accounting nga taga barangay Tawason sa dakbayan sa Mandaue gihatagan og Medal for Academic Exellence atol sa ika 120 ka tuig nga kasaulogan sa adlaw nga natawhan ni Justice Sotero Cabahug niadtong Abril 25 niining tuiga.
Ang gipasidunggan mao si Alexis Isok Cabalda, 22, nga anak nila ni Wilfredo ug Teresa Cabalda nga taga Tawason, sa maong dakbayan.
Si Mayor Jonas Cortes ug Bise Mayor Glenn Bercede maoy nangulo sa kalihokan sa maong kasaulogan nga naglakip sa paghalad og mga bulak sa monumento ni Cabahug nga nahimutang sa kilid sa city hall.
Si Wilfredo Cabalda nga amahan ni Alexis, kanhi nagtrabaho sa usa ka pribadong tambalanan sa dakbayan sa Sugbo ug retirado na usab nga magtutudlo sa publikong tulunghaan ang inahan niini.
Nadawat ni Cabalda ang maong pasidungog uban sa lain pang 20 pa ka mga aplikante nga Mandauehanon nga migradwar usab sa ilang pagtungha sa kolehiyo karong tuiga nga sama kang Cabalda nga adunay honor nga nadawat.
Si Cabalda maoy nadugang sa mikabat og 64 na ka mga Mandauehanon nga nakadawat og pasidungog ubos sa tinuig nga Justice Cabahug Award inig-abot sa kasaulogan sa adlaw’ng natawhan ni justice Cabahug.
Si Justice Cabahug maoy nag-una nga Mandauehanon nga nakalampus sa iyang pagtungha ug hangtod nga nanerbisyo siya sa kagamhanan.
Nahimo siyang private legal practitioner niadtong Mayo 2, 1923 ug nagserbisyo sa tulo ka sanga sa goberno nga naglakip sa pagka gobernador sa Sugbo, sekretaryo sa public works, sekretaryo sa national defense ug hangtod nga nahimong justice sa Court of Appeals. - BANAT NEWS