Panday nakuryentihan patay

CEBU, Philippines - Patay nang nadangat sa tambalanan ang usa ka panday nga nakuryentihan samtang nag welding didto sa Sityo Tabunok, barangay Poblacion sa lungsod sa Sta. Fe isla sa Bantayan niadtong Lunes sa alas 2:40 sa hapon.

Ang biktima mao si Rolito Esgana, 30, ulitawo, molupyo ra sa maong lugar ug usa ka panday ug mason ang trabaho.

Si PO2 Ben Almonicar sa Sta. Fe Police Station mibutyag sa Banat News nga ang biktima nagbalhin sa welding machine ngadto sa pikas lugar aron pagpaduol sa puthaw nga iyang weldingon niadtong tungora.

Apan matud pa aksidenti nga nabitik ang iyang tuong tiil sa wire niini ug ni-ground   hinungdan nga siya nakuryentihan.

Nawad-an sa panimuot ang biktima ug milagom na ang tuong batiis niini dihang nabantayan sa mga tawo sa maong lugar ug diha diha dayun ilang gipawong ang switch sa kuryenti.

Gisuwayan pa unta nila og hatud ngadto sa Bantayan District Hospital ang biktima apan gideklarar kini sa mga doctor nga dead on arrival.

Nasuta usab sa mga doctor nga nagrabihan sa pagka -kuryenti sa tuong batiis niini nga maoy nakaingon sa hinanali niining kamatayon.  - BANAT NEWS