Mayor sa Danao ipa-recall sa konseho

CEBU, Philippines - Nagkadako ang kagubot politika tali sa legislative department ug executive department sa dakbayan sa Danao nunot sa panagsungi sa mayor ug konseho.

Ang konseho sa maong dakbayan nangusog karon alang sa kampanya sa signature campaign sa mga konstituwente sa 36 sa kinatibuk-ang 42 ka barangay sa tinguhang ipa-recall si Mayor Ramon ‘Boy’ Durano Jr.

Sa press conference kagahapon sa buntag si bise Mayor Ramonito Durano III mitataw nga 22 na ka barangay ang iyang gibisitahan ug pulos mipadayag og suporta ang mga kapitan nga ipa-recall ang mayor.

Apan matud sa bise-mayor nga karun pang Hulyo nila i-file ang petition to recall base sa balaod sa Commission on Elections nga nagdili sa pagpahigayon og recall kung wala pay usa ka tuig gikan sa paglingkod.

Usa sa gihimong sukaranan sa mga konsehal mao ang giingong wala paghatag og bili sa mayor sa prinsipyo sa ‘separation of powers’ base sa balaod nga diin adunay kagawasan sa mga desisyon ang legislative ug executive base sa gilatid sa balaod.

Samtang gihulagway sa mga konsehal nga usa ka pagpanghulga ang gipagawas nga direktiba sa mayor nga pasakaan sila og kasong kriminal ug administratiba tungod sa wala nila pagtugot nga ipasar ang budget proposal sa mayor alang sa tuig 2011.

Sumala pa sa mga konsehal wala sila mopasar niini tungod kay wala kini masubay sa plataporma ug programang ilahang gisaad sa mga taga Danao.

Gibutyag niini nga niadtong una pang semana nagsugod ang signature campaign ug tinguha nilang mahuman kini karung Mayo 7 ug makakuha sila og 15 mil ka signature aron mahinayon gyud ang recall election.

Giklaro niya nga wala makamugna og confusion sa ilang partido ang gihimo karun sa mayor sanglit wala kini mo-resign sa ilang partido.

“Mayor did not officially resign sa Bakud Party. Wa sad mohimo og aksyon ang partido, niadtong oath taking sa mga barangay captains siya (mayor) maoy wala motambong,” pasabot pa sa bise mayor.

Giangkon sa bise mayor nga naapektahan gyud ang 600 ka mga casual ug job order employees human wala makadawat sa tulo ka bulan nilang suhulan tungod kay wala mapirmahe sa mayor ang ilang non-operational budget nga kuhaan sa suweldo sa maong mga empleyado.  - BANAT NEWS