Tulo ka robbery groups nag-operate dinhi

CEBU, Philippines - Adunay tulo ka grupo sa mga tulisang nag-operate dinhi sa Sugbu sumala pa sa pangulo sa Cebu Provincial Police Office ug usa niini maoy ilang gituohang responsable sa pagpanulis sa gasoline station sa barangay Tayud sa Consolacion nga mipatay sa gwardiya niadtong milabay’ng Lunes.

Si Sr. Supt. Patrocinio Comendador mibutyag sa mga tigbalita nga duna na sila’y lead sa maong mga grupo nga giingong naglakip sa Mindanao robbery group.

Ang Provincial Investigation and Detective Management Branch (PIDMB) ug Provincial Intelligence Branch (PIB) nakig-alayon na karun sa kapulisan sa lungsod sa Consolacion alang sa pagpahigayon og halapad nga imbestigasyon samtang padayon ang himuong checkpoints sa mga lugar diha sa dakbayan sa Mandaue.

Duha ka wala mailhing lalaki nga nagtaptap og panapton sa ilang mga nawong nga luwan sa usa ka motorsiklo misakiyo sa P150 mil nga halin sa maong gasolinahan diha sa Tayud ug gipusil patay pa ang guwardyang si Rolie Broca, 30, kinsa misuway og sukol niadtong tungora sa mga tulisan.

Ang Banat News nakakuha og impormasyon nga niadto lang adlawa gidestino si Broca diha sa maong gasolinahan human dunay re-shuffling nga gihimo ang ilang agency ug gani gikatahong gihatud pa sa ilang labaw si Broca nianang pagkabuntag.

Gihulagway hinuon ni Comendador nga ang mga tulisan nga miigo sa maong gasolinahan mga ‘unprofessional.’

“Kung professional walay binirahay posible nakalitan sila sa sitwasyon,” sumala pa ni Comendador.

Ang kapolisan nagbutang na hinuon og detachments sa mga utlanan sa lungsod sa Liloan ug dakbayan sa Mandaue nga maoy sagad nga gamitong lutsanan sa mga tulisan gikan sa lungsod sa Consolacion. Gipahimangnuan ni Comendador ang mga tag-iya og gasolinahan ug ubang financial institutions nga magbutang og closed-circuit television camera aron kung magkinaunsa adunay makuhang clue ang kapolisan.  - BANAT NEWS