CEBU, Philippines - Ang officer-in-charge (OIC) sa Talisay City Police Station (TCPS) nga si Senior Inspector Errol Francis Deveyra gipasanginlang protektor sa tanang ilegal sa dakbayan sa Talisay.
Niining bag-o lang ang hepe sa Philippine National Police nga si Raul Bacalso giingong nakadawat og mensahe sa text nga giingong namasangil kang Deveyra nga protektor og mga ilegal sa dakbayan sa Talisay.
Ang maong texter giingong mihangyo sa hepe sa kapolisan nga kini pahulipan aron magmalinawon ang siyudad. Ang maong text giingong diha gipadala sa programa sa kapolisan sa telebisyon nga “Mamang Polis.”
Si Deveyra nga nahinabi sa Banat News nagkanayon nga kagahapon gikatakda na niyang isumitir ang iyang tubag ngadto sa provincial headquarters sa pasangil batok kaniya.
Usa sa mga giingong reklamo, gipasanginlan si Deveyra sa texter nga protektor sa mga tulisan.
Matud usab niya nga duna siya’y certificate gikan ni Mayor Socrates Fernandez ug sa usa ka pari kabahin sa iyang mga gipangbuhat sa Talisay.
Kahinumduman nga si Deveyra milingkod isip OIC sa TCPS niadtong buwan sa Pebrero niining tuiga hulip kang Supt. Henry Biñas.
Si Deveyra nagkanayon nga dili kalikayan nga dunay masuko kaniya tungod kay dunay mga badlungon nga ilang nasikop ug napasakaan og kaso.
Si Deveyra mipasabot nga bisan unsaon pa nila og trabaho o pagpatuman sa balaod duna gyuy mga tawong dili makontento sa tanan nilang buhaton.
Kahinumduman nga human mapusili ug napatay sa tulisan si PO1 William Mangubat diha sa sitio Mananga, barangay Tabunok gimando dayon ni Deveyra ang pagbutang og police outpost sa maong dapit.
Gidugangan usab niini ang pagpahigayon og beat patrol nga magsuroy-suroy diha ilawom sa maong taytayan matag adlaw inubanan sa pagpahigayon og mga police checkpoints.
Namatikdan usab nga human sa pagpatuman sa maong mga kampanya wala na mausab ang insidente sa pagpanulis sa maong dapit, samtang giingong kadtong mga notadong badlungon ug bagis sa maong lugar namahawa na usab. - BANAT NEWS