Tulo ka karnaper nadakpan

CEBU, Philippines - Tulo ka tawo nga gituohang carnapper nasikop sa checkpoint sa kapolisan sa Theft and Robbery Section (TRS) sa Cebu City Police Office (CCPO) sa barangay Carreta, dakbayan sa Sugbo kagahapon sa kaadlawon.

Ang mga suspetsadong nasikop mao sila si Clyde Molde, John Rey Lanoza, ug John Mark Tagubat, pulos residente sa sitio Cagudoy, barangay Basak, sa dakbayan sa Lapulapu.

Si PO2 Pampe Tanajura sa Lapulapu City Police Station mibutyag sa Banat News nga sa wala pa mahitabo ang pagsikop sa mga suspetsado may usa ka tawo nga mitug-an sa kapolisan nga ang mga suspek nagpaingon sa dakbayan sa Sugbo.

Busa daling mipahigayon og checkpoint ang grupo ni Tanajura ug dihang miabot na ang tulo gipara dayon nila ug nasayran nga ang   Crypton Yamaha nga motorsiklo nga ilang gisakyan, kinarnap nila gikan sa tag-iya niini nga usa ka   kawani sa Philippine Air Force.

Si Chief Inspector Bonifacio Garciano, hepe sa TRS miingon nga ang tulo ka suspetsado nailhan nga maoy nagkuha sa maong motorsiklo niadtong Abril 21, 2011 didto sa dakbayan sa Lapulapu ug may -blotter kini sa buhatan sa TRS sa Lapulapu City Police Office (LCPO).

Matud ni Garciano nga ilang susihon ang background sa mga suspetsado kun wala ba malambigit sa pagpangarnap og motorsiklo dinhi sa dakbayan ug Metro Cebu. (WC) - BANAT NEWS